سەرۆکی فەرەنسا پشتگیری لە ڕێککەوتنی نێوان هەسەدە و حکومەتی سووریا دەکات

ئاڤا نیوز

سەرۆکی فەرەنسا، بە فەرمی پشتگیریی وڵاتەکەی بۆ ئەو ڕێککەوتنە دەربڕی کە ئەمڕۆ لە نێوان هەسەدە و حکومەتی سووریا ڕاگەیێنرا.

چیرۆکی سەرەکی: ئەمڕۆ هەینی، ڕێککەوتنی نێوان هەسەدە و دیمەشق ڕاگەیێنرا، بەپێی ڕێککەوتنەکە، سوپای سووریا لە ناوچەکانی حەسەکە و کۆبانی دەکشێتەوە، لە بەرامبەریشدا یەکەکانی هێزی ئاسایشی ناوخۆی سەر بە وەزارەتی ناوخۆی سووریا دەچنە ناو سەنتەری شارەکانی حەسەکە و قامیشلۆ.

بڵاوکراوەی فەرمی: ئیمانوێل ماکرۆن، سەرۆکی فەرەنسا لە تۆڕی ئێکس سێ خاڵی سەرەکی بۆ پاڵپشتی لە ڕێککەوتنەکە خستووەتەڕوو، دەڵێت: پشتگیری لە سووریایەکی خاوەن سەروەری و یەکگرتوو، سووریایەکی ئاشتیخواز بۆ هەموو پێکهاتەکانی و سووریایەکی بەشدار لە شەڕی دژی تیرۆر دەکەین.

ماکرۆن بەڵێنی داوە فەرەنسا لە ڕووی دیپلۆماسی و مرۆییەوە هاوکاریی ئاوەدانکردنەوەی سووریا بکات و گەرەنتیی پاراستنی مافی پێکهاتەکانی سووریا بکات.

ئەوەی پێویستە بیزانیت: لەسەر ئاستی جیهان، ئەو رێککەوتنە کاردانەوەی خێرای دروست کردووە؛ هەر لە دوای ماکرۆن، دیپلۆماتکارێکی باڵای کەنەدی گوتی، رێککەوتنی ئەمجارە لە سووریا مێژووییە و ئەنجامی دەبێت.