کارکردن لە چەند پڕۆژەیەکی وەستاو دەستپێدەکاتەوە

ئاڤا نیوز

ئەمساڵ ڕێکكارە كارگێڕییەكان بۆ ژمارەیەك پرۆژەی نیشتەجێبوون دەستیپێكردووەتەوە كە ماوەی چەندین ساڵە بەهۆكاری جۆراوجۆر وەستابوون.

لێدوانی فەرمی: د. محەممەد شوكری، سەرۆكی دەستەی گشتیی وەبەرهێنانی كوردستان تایبەت بە ئاڤا ڕایگەیاند، سێ پرۆژەی گرنگی نیشتەجێبوون لە شاری هەولێر، كە بەهۆكاری جیاواز وەستابوون، كاركردن تیایاندا دەستیپێكردووەتەوە، ئەوانیش؛ 'فلۆریا ستی' و 'وەرین ستی'ـن، هاوكات پرۆژەی دەشتی بەهەشتیش، پرۆپۆزەلی تەواوبووە و وەبەرهێنەری جێبەجێكاریش دیاریكراوە، ئەوەی ماوەتەوە دەستپێكردنی كردەییە بۆ تەواوكردنی پرۆژەكە.

زانیاریی زیاتر: سەرۆكی دەستەی وەبەرهێنان ئاماژەی بەوەشكرد، لە شارەكانی دهۆك و سلێمانیش دوو پرۆژەی هاوشێوە كە كاركردنیان تیایاندا وەستابوو، دەستپێدەكاتەوە. تاكە پرۆژەیەك كە گرفتی هەیە و ڕێكکارەكانی دەستپێكردنەوەی بە سست و خاوی بەڕێوە دەچێت، پرۆژەی 'كۆیە ستی'ـە، بەڵام پێشبینی دەكەین بە تەواوبوونی جووتسایدی هەولێر-كۆیە، شارۆچكەی كۆیە بووژانەوە لەسەرجەم بوارەكاندا بەخۆیەوە ببینێت و بازاڕی كڕین و فرۆشتنی خانوو و زەوی گەشەبسێنێت و پرۆژەكەش زیندوو ببێتەوە.

لەلایەكی دیكەوە: لەسەر ڕاسپاردەی سەرۆكوەزیران مەسرور بارزانی، حكومەتی هەرێمی كوردستان لەچوارچێوەی پرۆژەی دابینكردنی یەكەی نیشتەجێبوون بۆ پشتیوانیكردنی كەسانی كەمدەرامەت، دروستكردنی 720 شووقەی كەمدەرامەتان لە عەنكاوە دەستیپێكردووە و ناوەكانیش كۆكراونەتەوە، پرۆژەكەش لەماوەی دوو ساڵدا تەواو دەبێت، سەرۆكی دەستەی وەبەرهێنانی كوردستان وەهای گوت.