شەش ساڵ بەسەر خۆپیشاندانەکانی تشرین لە عێراق تێپەڕدەبێت

ئاڤا نیوز

 

ئەمڕۆ 25ی تشرینی یەکەم، شەش ساڵ بەسەر دەستپێکردنەوەی خۆپیشاندانە گەورەکانی خەڵکی عێراق لە ساڵی 2019 تێپەڕدەبێت.

 

چیرۆکی سەرەکی: لە مانگی تشرینی یەکەمی ساڵی 2019، خۆپیشاندان لە بەغدا و شارەکانی خوارووی عێراق دەستیان پێکرد، هۆکارەکەشی ناڕەزایەتی بوو لەسەر چەند خاڵێک، لەوانە: خراپی خزمەتگوزارییەکانی وەک کارەبا، ئاو و خزمەتگوزارییە گشتییەکانی دیکە. بێکاری زۆر بەتایبەت لەناو گەنجاندا. بڵاوبوونەوەی گەندەڵی کارگێڕی لە زۆربەی دامودەزگاکانی حکومەتدا.

 
هۆكارە زانراوەكان: خۆپیشاندەران داوای گۆڕانکاری گەورەیان دەکرد، لەوانە: لابردنی سیستمی حوکمڕانی و دەستلەکارکێشانەوەی تەواوی حکومەتەکەی ئەو کاتەی عادل عەبدولمەهدی.

 

کاریگەریی و لێکەوتەکان: لە بەرامبەر داواکاریی خۆپیشاندەران هێزە ئەمنییەکانی عێراق بە تووندی وەڵامی خۆپیشاندەرانیان دایەوە. گوللـەی ڕاستەقینە بەکار هات، بەهۆیەوە سەدان کەس کوژران و هەزاران کەسیش بریندار بوون.

 

زیانە سەرەكییەكان: خوێناویترین ڕۆژەکانی خۆپیشاندانەکان لە پارێزگای زیقار بوو، بەتایبەت ڕووداوەکەی "پردی زەیتوون" کە بووە هۆی کوژرانی ژمارەیەکی زۆر لە خۆپیشاندەران. ئەم ڕووداوە کاریگەرییەکی زۆری هەبوو و وای کرد عادل عەبدولمەهدی بڵێت: دەست لەکار دەکێشێتەوە.

 

چی ڕوویدا: لە 30ی تشرینی دووەمی هەمان ساڵ، عادل عەبدولمەهدی بەفەرمی دەستی لە پۆستی سەرۆکوەزیران کێشایەوە، ئەمەش دوای داواکارییەکی مەرجەعی باڵای ئایینی، عەلی سیستانی، هات.