عێراق و ئێران لەسەر هاتووچۆی ئۆتۆمبێلی تایبەت ڕێککەوتن

ئاڤا نیوز

ئەمڕۆ شەممە (25ی تشرینی یەکەمی 2025)، ئیدارەی هەردوو پارێزگای میسان و خوزستان،  بۆ ماوەیەکی کاتی ڕێککەوتن لەسەر ڕێگەپێدان بە هاتووچۆی ئۆتۆمبێلی تایبەت لە نێوان هەردوو وڵاتدا، ئەم بڕیارەش لێکدانەوەی جیاوازی لێکەوتەوە.

چیرۆکی سەرەکی: بەپێی ئاژانسی هەواڵی فارس،  ڕێککەوتنێک لە نێوان ئیدارەی هەردوو پارێزگای میسانی عێراق و خوزستانی ئێران ئەنجامدراوە کە بە شێوەیەکی کاتی ڕێگە بە هاتووچۆی ئۆتۆمبێلی تایبەتی هاووڵاتییان لە ڕێگەی دەروازەی سنووریی جەززابەی نێوان هەردوو وڵاتدا دەدات."

لێدوانی فەرمی: مەهدی کەرەمی، شارەزا لە کاروباری گەشتیاریی هەرێمیدا، ڕایگەیاند: هەرچەندە ئەم بڕیارە کارئاسانی بۆ گەشتیاران دەکات، بەڵام  پێویستی بە ڕێکخستن و چاودێری هەیە بۆ دڵنیابوون لەوەی کە نەگۆڕێت بۆ نمایشکردنی ئۆتۆمبێلی گرانبەها لەو ناوچانەی کە دانیشتووانەکەی بەدەست قەیرانە ئابوورییەوە دەناڵێنن.

لەلایەکی دیکەوە: شارەزایان پێیان وایە ئەم بڕیارە لە چوارچێوەی گەشتیاری تێدەپەڕێت و چونکە باکووری ئێران، کە شوێنێکی گەشتیارییە و خەڵکی عێراق زۆر سەردانی دەکەن، جیاوازییەکی ئابووریی زۆر لە نێوان گەشتیار و کۆمەڵگەی ناوخۆیی ئەو وڵاتەبەدی دەکرێت. 

ئەمەش بزانە: بەپێی ڕاپۆرت و گێڕانەوەی شایەتحاڵان و گرتەی ڤیدیۆیی بەشێک لە خوێندکارانیی عێراقی بە ئۆتۆمبێلی گرانبەها کە تابلۆی عێراق و ئاڵای نیشتمانییان پێوەیە، لە کاتی تێپەڕبوونیان بە ڕێگا قەرەباڵغە گەشتیارییەکاندا خەڵکی ئەو وڵاتەیان بێزارکردووە و هەندێک جار کاردانەوەی نەرێنی لەلایەن هاووڵاتییانەوە لێکەوتووەتەوە.