ئەحمەد شەرع بە سەردانێکی فەرمی دەچێتە سعوودیە

ئاڤا نیوز

بڕیارە ئەمڕۆ دووشەممە سەرۆککۆماری سووریا بە سەردانێکی فەرمی سەردانی شانشینی عەرەبی سعوودیە بکات و لەگەڵ شازادەی جێنشینی ئەو وڵاتە کۆببێتەوە.

چیرۆکی سەرەکی: بە مەبەستی بەشداریکردن لە کۆنفرانسی "دەستپێشخەری داهاتووی وەبەرهێنان" کە بڕیارە ئەمڕۆ دووشەممە 2025-10-27، لە ڕیازی پایتەختی سعوودیە بەڕێوەدەچێت. ئەحمەد شەرع، سەرۆککۆماری سووریا سەردانی ئەو وڵاتە دەکات و لە میانی کۆنفرانسەکەش وتارێک پێشکەش دەکات.

ڕاگەیێنراوی فەرمی: بەگوێرەی ڕاگەیێنراوی سەرۆکایەتیی کۆماری سووریا، ئەحمەد شەرع، سەرۆکی سووریا، چاوی بە محەمەد بن سەلمان، شازادەی جێنشینی سعودیە، دەکەوێت بۆ تاوتوێکردنی پەرەپێدانی هاوکاریی هاوبەش لە نێوان هەردوو وڵاتدا، بەتایبەتی لە بوارەکانی وەبەرهێنان و هاوکاریی ئابووریدا، جگە لە گفتوگۆکردن لەسەر گۆڕانکارییە ناوچەیی و نێودەوڵەتییەکان کە جێی بایەخی هاوبەشی هەردوو وڵاتن.

زانیاریی زیاتر: ئەحمەد شەرع، سەرۆکایەتیی شاندێکی باڵای وڵاتەکەی دەکات کە پێکهاتوون لە ژمارەیەک لە وەزیرەکان و بەرپرسانی باڵا و شارەزایانی نیشتمانی، بڕیارە چەندین کۆبوونەوە لەگەڵ کۆمپانیا گەورەکانی بواری وەبەرهێنان و دامەزراوە ئابوورییەکانی جیهان بکەن.

لەهەمان کاتدا: شاندەکە کۆبوونەوە لەگەڵ گەورەترین وەبەرهێنەرە جیهانییەکان و دامەزراوە داراییە نێودەوڵەتییەکان دەکات بۆ دروستکردنی ڕێڕەوی وەبەرهێنان لە کەرتەکانی ژێرخان و نیشتەجێبوون و وزە و تەندرووستی و تەکنەلۆجیا و پیشەسازییە بەردەوامەکان.