شاندێکی کوردستان بۆ سێ مەبەست گەیشتە بەغدا

ئاڤا نیوز

شاندێکی هەرێمی کوردستان بۆ گفتوگۆکردن لەگەڵ بەرپرسانی حكومەتی عێراق سەبارەت بە دەروازەکان و جێبەجێکردنی سیستمی (ئەسیکۆدا) و کێشەی کۆمپانیاکان گەیشتنە شاری بەغدا. 

 

چیرۆکی سەرەکی؛ شەوی سێشەممە، شاندێکی حکومەتی هەرێمی کوردستان كە پێكهاتوون لە سامی جەلال، ڕاوێژكاری وەزارەتی ناوخۆ و کەمال ڕەئوف، بەڕێوەبەری گشتیی گومرگی هەرێمی كوردستان، کەمال تەیب، بەڕێوەبەری گشتی باج و خانووبەرەی میری و جەوهەر محەممەد، جێگری بەڕێوەبەری گشتیی گومرگ گەیشتنە شاری بەغدا.

 

زانیاریی تایبەت؛ بەپێی ئەو زانیارییانەی دەست ئاڤا میدیا كەوتوون شاندەکەی حکومەتی هەرێمی کوردستان دوو ڕۆژ لە بەغدا دەمێننەوە و ژمارەیەک کۆبوونەوە و دیداریان لەگەڵ بەرپرسانی لایەنە پەیوەندیدارەکانی عێراق دەبێت.

 

ئەوەی پێویستە بیزانیت؛ عێراق بڕیاریداوە تا 2025-12-01، سیستمی ئەسیکۆدا لە سەرانسەری وڵات جێبەجێ بکرێت، حکومەتی هەرێمی کوردستانیش داوای کردووە سیستمی گومرگیی هەرێمی کوردستان وەک خۆی بمێنێتەوە و ئالوگۆڕی زانیاری لەنێوان هەردوولادا هەبێت.

 

بەرپرسانی پەیوەندیدار لە هەرێمی كوردستان جەخت دەكەنەوە كە سیستمی گومرگیی هەرێمی کوردستان زۆر لە سیستمی ئەسیکۆدا پێشکەوتووترە، بارکۆد و QRـی هەیە و هەموو زانیارییەکانی لەخۆگرتووە.

 

ئەمەش بزانە؛ ئەسیکۆدا شێوازێکی نێودەوڵەتیی بەڕێوەبردنی گومرگە بازرگانیی دەرەکی تێدا ڕێکخراوە و زانیاری لەسەر جۆرى کاڵا بازرگانییەکان دەستەبەر دەکات، ئەوە جگە لە ئاسانکاریی ڕێوشوێنەکانی گواستنەوەی کاڵا. هەر وڵاتێکى بەشدار سیستمی تایبەت بە خۆی دەبێت.