بەرهەم ساڵح کاندیدە بۆ پۆستێکی جیهانی

ئاڤا نیوز

 

د. بەرهەم ساڵح کاندیدە بۆ پۆستی کۆمیسیاری باڵای نەتەوەیەکگرتووەکان بۆ کاروباری پەنابەران (UNHCR). لەوبارەیەوە بەرپرسێکی باڵای کورد دەڵێت، "کاندیدی عێراق و کوردستانە و پشتگیری تەواوەتی پارتی هەیە."

 

وێنە گەورەکە: د. بەرهەم ساڵح، سەرۆكکۆماری پێشووتری عێراق یەكێكە لە كاندیدەکان بۆ پۆستی کۆمیسیاری باڵای نەتەوەیەکگرتووەکان بۆ کاروباری پەنابەران، كە بە دووەم گرنگترین پۆست دادەنرێت لە دوای سكرتێری گشتی نەتەوەیەكگرووەكان و زیاتر لە (70) ساڵە هیچ كە سایەتییەك لە ڕۆژهەڵاتی ناوەڕاست ئەو پۆستەی وەرنەگرتووە، زیاتر كەسایەتییە ناودارەكانی وڵاتانی ئەوروپا وەریدەگرن.

 

لێدوانی فەرمی: هۆشیار زێباری، ئەندامی مەکتەبی سیاسیی پارتی دیموکراتی کوردستان لە پۆستێکدا لە هەژماری تایبەتی خۆی لە (ئێکس) ڕایگەیاند، "د. بەرهەم ئەحمەد ساڵح کاندیدی عێراق و کوردستانە بۆ پۆستی کۆمیسیاری باڵای نەتەوەیەکگرتووەکان بۆ کاروباری پەنابەران (UNHCR) و پشتگیریی تەواوی ئێمەی هەیە."

زێباری لە پۆستەکەیدا جەختی لەوە کردووەتەوە کە د. بەرهەم ساڵح هەموو ئەو بڕوانامە و لێهاتووییانەی هەیە کە پێویستن بۆ نوێنەرایەتیکردنی ئەم دەزگا مرۆییە زۆر گرنگە.

داوای لە "هەموو وڵاتانی ئەندام کردووە کە پشتگیری لە کاندیدکردنی ناوبراو بکەن." و ئاماژەی بەوەداوە کە "ئەم هەفتەیە یەکلادەکرێتەوە."

ئەوەی پێویستە بیزانیت: بەپێی سەرچاوە دیپلۆماسییەکان کە بۆ ئاڤا قسەیان کردووە، نزیکەی 10 کەسایەتی لەسەر ئاستی جیهان کاندیدن بۆ ئەم پۆستە. واتە 10 کەس شۆرت لیست [هەڵبژێردراون]کراون، لە یەک دوو هەفتەی داهاتوودا لەو 10 کەسە لەلایەن لیژنەیەکی نەتەوەیەکگرتووەکان یەکێکیان هەڵدەبژێردرێت، بڕیاری کۆتاییش ئەنتۆنی گۆتێرێس، سکرتێری نەتەوە یەکگرتووەکان خۆی دەیدات. هاوکات  ئەم پۆستە بۆ ماوەی 5 ساڵە و دەکرێت نوێ بکرێتەوە.

لەلایەکی دیکەوە: پێشتریش جەمال ئەلموشەرەخ، نوێنەری ئیمارات لە نەتەوەیەکگرتووەکان ڕایگەیاندبوو، "ئیمارات و ژمارەیەک وڵاتی عەرەبی دیکە پشتگیری بەرهەم ساڵح دەکەن بۆ پۆستەکە".