ئەنجوومەنی لۆردەكانی بەریتانیا بڕیاری ناردنی پەنابەرانی بۆ ڕواندا دواخست

ئاڤا دیجیتاڵ

ئەنجوومەنی لۆردەكانی بەریتانیا بڕیاری ناردنی كۆچبەرانی وڵاتەكەی بۆ ڕواندا دواخست، لەكاتێكدا ماوەیەکی زۆرە ڕیشی سوناک، سەرکوەزیرانی بەریتانیا دەیەوێت یاسای ڕواندا جێبەجێ بکات و کۆچبەرانی نائاسایی لە وڵاتەکەیدا کەمبکاتەوە.

چیرۆکە سەرەکییەکە: ئەنجوومەنی لۆردەکانی بەریتانیا بڕیاری ناردنی کۆچبەرانی وڵاتەکەی بۆ ڕواندا بە کۆی 214 دەنگ دواخست، داوا لە پەرلەمانی وڵاتەکەش دەکەن، وردبینی زیاتر بۆ بڕیارەکە بکرێت و دڵنیاببنەوە لەوەی ڕواندا بۆ کۆچبەران سەلامەت دەبێت.

ئەوەی پێویستە بیزانیت: ماوەیەکی زۆرە ڕیشی سوناک، سەرکوەزیرانی بەریتانیا دەیەوێت یاسای ڕواندا جێبەجێ بکات و کۆچبەرانی نائاسایی لە وڵاتەکەیدا کەمبکاتەوە، تا ئێستا بە هۆکاری جیاواز و ڕازینەبوونی وەزیرەکان و ئەنجوومەنی لۆردەکانی بەریتانیا ئەم یاسایە دواخراوە و ڕاگیراوە، بەڵام سوناک ڕژدە لەسەر جێبەجێکردنی ئەم بڕیارەی.

دواخستنی بڕیارەکە لەلایەن لۆرد گۆڵدسمیس، سەرۆکی لیژنەی ڕێککەوتنە نێودەوڵەتییەکانەوە پێشنیاز کرا، چونکە پێویستی بە هەنگاوی یاسایی زیاترە.

لێدوانە فەرمییەکان: لۆرد گۆڵدسمیس، سەرۆکی لیژنەی ڕێککەوتنە نێودەوڵەتییەکان ڕایگەیاند "ئێمە ناڵێین هەرگیز نابێت بڕیارەکە پەسەند بکرێت، بەڵکو دەڵێین پێویستە پەرلەمان دەرفەتی ئەوەی هەبێت بەتەواوی پەیماننامەکە و ڕێوشوێنی جێبەجێکردنی بپشکنێت و بەدواداچوونی بۆ بکات، پێش ئەوەی بڕیارێک بدات سەبارەت بە جێگەیەکی وەک ڕواندا کە سەلامەت نەبێت".

وێنە گەورەكە: بەریتانیا یەكێكە لەو وڵاتانەی زۆربەی كۆچبەرانی جیهان ڕووی تێدەكەن، لە ساڵی 2023 بە بەراورد بە ساڵی 2022 ڕێژەی ڕۆشتنی كۆچبەری نایاسایی بۆ وڵاتەکە بەهۆی ترس لە یاسای ڕواندا لە 37% کەمی کردووە.

باکگراوند: لە 12ـی کانوونی دووەمی ساڵی رابردوودا، پەرلەمانی بەریتانیا بە زۆرینەی دەنگ ناردنی کۆچبەرانی بۆ ڕواندا پەسەند کرد، لە کۆی 582 پەرلەمانتار، 313 پەرلەمانتار دەنگیان بە بەڵێ دا و 269 پەرلەمانتاری دیکەش دەنگیان بە نەخێردا، لە کۆتاییدا بە جیاوازی 44 دەنگ یاساکە تێپەڕێندرا، بەڵام ئەم یاسایە لەلایەن ئەنجوومەنی لۆردەکانی بەریتانیا و بە پێشنیازی لۆرد گۆڵدسمیس دواخرا.