سەرۆكوەزیرانی هەمووان ڕێگەنادات مەشخەڵی "نەورۆز" بكوژێتەوە

ئاڤا میدیا

 

پشتیوانی مەسرور بارزانی، سەرۆكوەزیرانی كوردستان بۆ یانەی نەورۆز لەوەختێكدا هات ئەو یانەیە پێویستی بە پشتیوانییەكی گەورە و بەهێز هەبوو، چونكە هەر لەسەرەتاوە پلانەكە بۆ ئەوەبوو ئەو یانەیە كۆتایی پێبهێنرێت، بەڵام نەیانتوانی، بۆ لەمەودواش لەپاش پشتیوانی سەرۆك وەزیران، هەرگیز "ناتوانن". 

 

یانەی نەورۆز خاوەنی چەندین نازناو و بردنەوە و ئەنجامی جوانە بۆ سلێمانی و بۆ كوردستان، شایانی ئەوە نیە بكرێتە قوربانی ململانێی سیاسی، بەڵكو شایانی هەموو پشتیوانییەكی ماددی و مەعنەویە.

 

سەرۆكوەزیرانی كوردستانیش بۆ ڕێگری لە كەوتنی ئەو یانەیە كە دەیان هەزار دۆست و هەواداری هەیە هاتۆتە سەرخەت و پشتیوانیانە، هەمووشتان دەزانن سەرۆك وەزیران مەسرور بارزانی كەویستی شتێك بكات دەیكات و بەر لەوەی بەڵێن بدات جێبەجێی كردوە و تەواو. 

 

بەپێچەوانەی چاوەڕوانی نەیاران  و نیگەرانیی دۆستان كە وا دەزانرا ئیدی كوردستان و سلێمانی لە یانەیەكی وەك نەورۆز بێبەش دەبن  و مەشخەڵی نەورۆز دەكوژێتەوە، ئەمڕۆ لەهەركات زیاتر ئومێد بە گەشانەوەی نەورۆز زیادیكردووە و لە داهاتوودا سەركەوتنی گەورەتریش لە نەورۆز دەبینین.

 

یانەی نەورۆز كە ئەو یاریگا ناوازە و قەشەنگە نێودەوڵەتیەی لە سلێمانی پێشكەشی كوردستان كردووە، بگرە لەسەر ئاستی عێراق ئاستبەرزترین یاریگایە، حەیفە ڕێگە بدرێت بپوكێتەوە، بەڵكو ئەوە یانەی هەمو كوردستانیانە و دەبێت بەهەموومان پشتیوانی بكەین تا هەستێتەوە و ببوژێتەوە.

 

نهێنیەك ناڵێین ئەگەر بڵێین هەر لەسەرەتاوە و تەنانەت پێش رووداوەكانی لالەزاریش پلان هەبوو بۆ بچووككردنەوەی ئەم یانەیە، ئەوانەی چاودێرن ئەمە دەزانن، بەڵام نەیاتوانی و ناشتوانن.

 

خۆشبەختانە خێزانی ئاڤامیدیاش وەك هەمو دەستپێشخەرییەكانی دیكەی هەر لەسەرەتاوە بێ هیچ جیاوازیەك هەر لەسەرەتای قەیرانەكەوە هاتنە سەرخەت بۆ پشتیوانییكردنی ئەم یانە جوانە و میدیاكەی خۆی خستە خزمەت هەستانەوەی یانەكە.

 

خەڵكی بە ئەمەكی كوردستانیش بەشداربوون لە كۆمەكی دارایی و مەعنەوی یانەكە و "چاكی مەردایەتی وكوردایەتیان لێ هەڵماڵی" و درێغیان نەكرد، هەروەها لەپاڵ هەموو ئەمانەشدا پشتیوانی سەرۆك وەزیران بۆ یانەکە، بەتەواوی مەشخەڵی  نەورۆزی جارێكی تر بوژاندەوە و نەیهێشت ئەو ئاگرە بكوژێتەوە.

 

پشتیوانی سەرۆك وەزیران بۆ یانەی نەورۆز تەنها ماددیی نییە و ئەوە بەشێكی پشتیوانییەكەیە، بەڵكو ئەم پشتیوانییە مەعنەویە و واتای ئەوەیە كە ئیدی نەورۆز نەك ناوەستێ، بەڵكو بەرەو پێشتریش دەچێت و گەرمو گوڕتریش دەبێت و سەركەوتنی گەورەتریش تۆمار دەكات.

 

جەماوەری یانەی نەورۆز كە تا دوێنێ لەو قەیرانە قورسەدا فرمیسكیان بۆ یانەكەیان دەڕشت، ئەمرۆ بە هیواو ئومێدەوە ڕووەو ئایندەیەكی گەشتر هەنگاو دەنێن و مەشخەڵی یانەكەیان لەم سەركەوتن بەرەو ئەوسەركەوتن دەبەن و هەرگیز نایەڵن بكوژێتەوە، ئەو جەماوەرە ئەمڕۆ پڕ بەگەرویان هاوار دەكەن "ناتوانن". بەڵێ هەرگیز "ناتوانن" یانەیەكی بەهێزی وەك نەورۆز لەناوبەرن.