گرووپێکی عێراقی دژی سوودانی دەوەستێتەوە: چەک ڕادەست ناکەین

ئاڤا نیوز

 

هەرچەندە سەرۆکوەزیرانی عێراق ڕایگەیاندووە بە کشانەوەی تەواوی هێزەکانی ئەمریکا و هاوپەیمانان، هیچ پاساوێک بۆ چەکی دەستی گرووپەکان نامێنێت، بەڵام وتەبێژی کەتائیبی حیزبووڵڵای عێراقی دەڵێت، چەکی دەستیی ئەوان ڕێکخراوە و ڕادەستی ناکەن.

 

ئەوەی پێویستە بیزانیت: 3ى ئەم مانگە محەممەد شیاع سوودانی، سەرۆکوەزیرانی عێراق ڕایگەیاند، تا هێزەکانی ئەمریکا لە وڵاتەکەی نەکشێنەوە، ناتوانرێت چەک لە دەستی گرووپە چەکدارەکان دەربهێنرێت، بۆیەش ئێستا کە داعش بوونی نەماوە چیتر هیچ پاساوێک بۆ مانەوەی هێزەکانی ئەمریکا و هاوپەیمانان نەماوە.

 

لێدوانی فەرمی؛ جەعفەر حوسێنی، وتەبێژی کەتائیبی حیزبووڵڵای عێراق ڕایگەیاند، ئەگەر نەیارەکانیان پێیان خۆش یان ناخۆشبێت، شیعە دەسەڵات و حکومڕانی تەواوی بەسەر عێراقدا هەیە، "چەکەکانیشمان لەژێر دەستماندا دەمێننەوە چونکە بەهۆی ئەو چەکانەوە بە مووشەک و درۆن هێرشمانکردووەتە سەر بنکەکانی ئەمریکا و لە خاکی داگیرکراوی فەڵەستینیش، ئیسرائیلمان بە ئامانج گرتووە، ئەوەش ڕۆڵی ئێمە بووە بۆ پاراستنی سەروەریمان".

 

زانیاریی زیاتر؛ وتەبێژەکەی کەتائیبی حیزبووڵڵای عێراق وتیشی، لە هێرشەکاندا بە دووری لانیکەم هەزار کیلۆمەتر لە ئامانجەکانیان داوە، ئەوەش توانای "مقاوەمەیە، توانای چەکی شیعەیە و ئێمە بە هێزەوە قسە دەکەین، کاتێک باس لە ڕێکخستنی چەکیش دەکەین، بەڵێ چەکی ئێمە شەرعی و ڕێکخراوە، خۆ ڕێکخستنی چەک بەپێوەری سیاسییەکان نییە، ئەم چەکە ڕێکخراوە و لە دەستی شیعەش دەمێنێتەوە".