بەشێکی سوننە بەفەرمی کاندیدی خۆی بۆ سەرۆکی پەرلەمان دیاری کرد

ئاڤا نیوز

دوای چەندین هەوڵ و کۆبوونەوە، دواجار ئەنجوومەنی سیاسیی نیشتمانی کە هێزە سوننەکانی براوەی هەڵبژاردن لەخۆدەگرێت، بڕیاریدا هەیبەت حەلبووسی بۆ پۆستی سەرۆکی پەرلەمان دیاری بکات.

چیرۆکی سەرەکی: شەوی یەکشەممە 28-12-2025، ئەنجوومەنی سیاسیی نیشتمانی کە هێزە سوننەکانی براوەی هەڵبژاردن لەخۆدەگرێت لە ماڵی خەمیس خەنجەر، سەرۆکی پێشووی هاوپەیمانی سیادە بۆ یەکلاکردنەوەی کاندیدێک بۆ پۆستی سەرۆکی پەرلەمان کۆبووەوە.

لێدوانی ڕۆژنامەوانی: خەمیس خەنجەر، سەرۆکی پێشووی هاوپەیمانی سیادە، لە کۆنگرەیەکی ڕۆژنامەوانیدا ڕایگەیاند، ئێمە لە حیزبی تەقەدووم، حیزبی سیادە، حیزبی حەسمی وەتەنی و حیزبی جەماهیری وەتەنی، ڕێککەوتین لەسەر ئەوەی تاکە کاندیدمان بۆ پۆستی سەرۆکی پەرلەمان بۆ خولی شەشەم بە مەبەستی تەواوکردنی شایستە دەستوورییەکان، هەیبەت حەلبووسی کاندید بکەین".

لەلایەکی دیکەوە: هاوپەیمانی عەزم ڕایگەیاند، موسەننا سامەڕائی، سەرۆکی هاوپەیمانێتییەکە، تاکە کاندیدیانە بۆ پۆستی سەرۆکی پەرلەمان. هاوپەیمانێتییەکە لە ڕاگەیێنراوێکدا جەختی لەوە کردووەتەوە کە "هەر قسەیەک لەبارەی کشانەوەی کاندیدبوون دوورە لە ڕاستییەوە."

باکگراوند: هەیبەت حەمەد عەباس حەلبووسی، سیاسییەکی عێراقییە و لەدایکبووی ساڵی 1980ـیە، هەڵگری بڕوانامەی بەکالۆریۆسە. لە خولی چوارەمی ئەنجوومەنی نوێنەرانی عێراقدا (2018-2022) پۆستی سەرۆکی لیژنەی نەوت و وزەی بەڕێوەبردووە، هەروەها بە یەکێک لە سەرکردە دیارەکانی حیزبی تەقەدووم دادەنرێت کە لەلایەن محەممەد حەلبووسییەوە سەرۆکایەتی دەکرێت.