لویس ساکۆ: ئامادەم بۆ لەسێدارەدان لەپێناو ڕزگارکردنی عێراق

ئاڤا نیوز

پاتریاک و سەرۆكی كەنیسەی كلدانی لە عێراق و جیهان ڕایدەگەیێنێت، ئامادەیە بۆ لەسێدارەدان لەپێناو ڕزگارکردنی عێراق و هەموو ئەو دەنگۆیانەش ڕەتدەکاتەوە کە گوایە سەردانی ئیسرائیلی کردبێت.

چیرۆکی سەرەکی: بەکارهێنانی دەستەواژەی "ئەلتەتبیع" لەلایەن كاردیناڵ لویس ساكۆ، پاتریاک و سەرۆكی كەنیسەی كلدانی لە عێراق و جیهان لە ڕێوڕەسمی جەژنی ڕۆژی لەدایکبوونی پێغەمبەر مەسیح (سڵاوی خوای لەسەر بێت)، کاردانەوەی زۆری لێکەوتەوە.

پەیامی فەرمی: كاردیناڵ لویس ساكۆ، پاتریاک و سەرۆكی كەنیسەی كلدانی لە عێراق و جیهان پەیامێکی ڤیدیۆیی بڵاوکردەوە، لە پەیامەکەدا ڕوونیدەکاتەوە کە قەت باسی ئاساییکردنەوەی پەیوەندییەکانی لەگەڵ ئیسرائیل نەکردووە و هەمیشە دژی ئەم شتەیە. بەڵکو باسی ئاساییکردنەوەی پەیوەندییەکانی لەگەڵ عێراق و لەپێناو عێراقدا کردووە، چونکە عێراق وڵاتی ئیبراهیم و شارستانییەتەکانە.

لەهەمان کاتدا: ساکۆ نیگەرانی خۆی دەخاتەڕوو لەوەی زۆربەی ئەوانەی کۆمێنتیان بۆ کردووە، گوێیان لە گوتارەکەی نەبووەو شیکارییان نەکردووە، بەڵکو بە سۆز و تووندوتیژی کاردانەوەیان هەبووە. ئاماژەی بەوەدا، ئەو لایەنە هەوڵی ساختەکردنی دەنگێکیان داوە کە گوایە سەردانی ئیسرائیلم کردووە، کە ئەمە تەواو ناڕاستە.

زانیاریی زیاتر: ساکۆ ئاماژەی بەوەدا، ئەگەر لەپێناو ڕزگارکردنی عێراقدا حوکم بدرێم یان لەسێدارە بدرێم، ئامادەم و  "لە هیچ کەسێک ناترسم."

ئەوەی پێویستە بیزانیت: ئەمە دووەم ڕوونکردنەوەی كاردیناڵ لویس ساكۆ، پاتریاک و سەرۆكی كەنیسەی كلدانی لە عێراق و جیهانە لەدوای گوتارەکەی لە شەوی 24ـی ئەم مانگە، پەیامەکەی پێشتری ئاراستەی موقتەدا سەدر، ڕێبەری ڕەوتی نیشتمانیی شیعە کردبوو. خەمباریی خۆی دەربڕیبوو لەوەی قسەکانی لە میانی وتارەکەیدا لە چوارچێوەی خۆی دەرهێنراون.