کۆمیسیۆن مۆڵەتی 30 ڕۆژ بە كاندیدەكان دەدات بۆ لێكردنەوەی پۆستەرەكانیان

ئاڤا نیوز

 

كۆمیسیۆنی هەڵبژاردنەكانی عێراق، مۆڵەتی 30 ڕۆژ بە كاندید و لایەنە سیاسییەكان دەدات بۆ لێكردنەوەی پۆستەرەكانی بانگەشەی هەڵبژاردن.

 

چیرۆكی سەرەكی: ڕۆژی سێشەممە، 11ـی تشرینی دووەمی 2025، پرۆسەی دەنگدانی گشتی بۆ خولی شەشەمی ئەنجوومەنی نوێنەرانی عێراق بەڕێوەچوو. بڕیارە ئەمڕۆ ئێوارە کاتژمێر 6:00 ئەنجامی بەرایی هەڵبژاردنەکە ڕابگەیێنرێت. حەوت هەزار و 768 كەس لە چوارچێوەی 124 حیزب و هاوپەیمانیی یاخود سەربەخۆ، خۆیان كاندید كردبوو.

 

ڕاگەیێنراوی فەرمی: كۆمیسیۆنی باڵای سەربەخۆی هەڵبژاردنەكانی عێراق ڕایگەیاند، لە ئەمڕۆوە تاوەكو 30 ڕۆژ ماوە لەبەردەست كاندیدەكان دەبێت بۆ لێكردنەوەی سەرجەم پۆستەر و بانگەشەكان لە شەقام و شوێنە گشتییەكان.

 

ڕوونیشی كردووەتەوە، هەر کاندیدێک لەماوەی دیاریكراودا پۆستەری بانگەشە لانەبات، ئەوا تیمەكانی كۆمیسیۆن خۆیان بەو كارە هەڵدەستن و تێچووی لابردنی پۆستەرەكان لەو بڕە پارەیە دەگێڕنەوە كە لە هەر کاندیدێک وەكو بارمتە وەرگیراوە.

 

لەلایەكی دیكەوە: لەبارەی تانەگرتن و تۆماركردنی سكاڵا لە هەڵبژاردن، كۆمیسیۆن ئاماژەی بەوە كردووە، كە تاكوو ئێستا 77 سكاڵا لەسەرانسەری عێراق لە هەردوو دەنگدانی گشتی و تایبەت تۆمار كراون.