مەسرور بارزانی وەڵامی دوو پرسیاری ئاڤا دەداتەوە لەبارەی پێکهێنانی هەردوو حکومەتی نوێی کوردستان و عێراق

ئاڤا نیوز

سەرۆکوەزیران مەسرور بارزانی وەڵامی دوو پرسیاری گرنگی ئاڤا دەداتەوە و مەرجی پارتیشی بۆ پێکهێنانی حکومەتی عێراق ئاشکرا کرد.

چیرۆکی سەرەکی: ئەمڕۆ یەکشەممە سەرۆکوەزیران مەسرور بارزانی، بەردی بناغەی پڕۆژەیەکی گرنگی بۆ دووبارە بەکارهێنانەوەی ئاوەڕۆی ماڵانی لە هەولێر دانا، دواتر وەڵامی پرسیاری ڕۆژنامەنووسانی دایەوە لەسەر چەند بابەتێکی گرنگ لەوانەش؛ پێکهێنانی حکومەتی نوێ عێراق و هەرێمی کوردستانیش. 

لێدوانی فەرمی: مەسرور بارزانی، سەرۆکوەزیرانی کوردستان لەدوای دانانی بەردی بناغەی پڕۆژەی پاککردنەوەی ئاوەڕۆی هەولێر، وەڵامی دوو پرسیاری، حەسەن، پەیامنێری دیپلۆماسی ئاڤای دایەوە لەبارەی پێکهێنانی هەردوو حکومەتی نوێی کوردستان و عێراق.

- مەسرور بارزانی لەبارەی پیکهێنانی کابینەی 10ی کوردستان گوتی: گفتوگۆکان نەوەستاون، دوای هەڵبژاردنی پەرلەمانی عێراق هەلومەرجی نوێ هاتۆتە پێش، لەسەر ئەو بنەمایە ئێمە لە گفتوگۆ بەردەوام دەبین، هیوادارم بتوانین حکومەتێک پێکبهێنین لە ئاست متمانەی خەڵک بێت و بۆ بەرژەوەندی خەڵکی کوردستان بێت.

- لەبارەی پێکهێنانی حکومەتی عێراق و دانانی سەرۆکوەزیرانی نوێی عێراق مەسرور بارزانی گوتی: دوای هەڵبژاردن هێزی پارتی لەسەر ئاستی کوردستان و هەموو عێراق دەرکەوت، زۆر ئاساییە هەموو لایەک ڕوو لە پارتی بکات و داوای یارمەتی بکات، ئێمە وەکو لایەنێکی بەشدار لە حکومەت بەرنامە و مەرجی ئێمە ئەوە دەبێت ئەجێندانی حکومەت چییە لە جێبەجێکردنی ئەو ماددە دەستوورییانەی بۆ هەموو عێراق گرنگن بە تایبەت بۆ هەرێمی کوردستان، بۆ ئێمە ئەجێندای حکومەتی داهاتوو زۆر زۆر گرنگە.