کارەساتێکی خێزانی لە دیوانییە: کوڕێک دایک و باوکی کوشت، پاشان لەلایەن براکەیەوە کوژرا

ئاڤا نیوز

لە ڕووداوێکی دڵتەزێندا لە دیوانییە، پێنج کەس لە یەک خێزاندا کوژران. گەنجێک دوای ئازادبوونی لە زیندان دایک و باوکی و براژنەکەی دەکوژێت، پاشان لەلایەن برایەکیەوە دەکوژرێت.

زانیاریی بەدەستهاتوو: سەرچاوە ئەمنییەکان لە دیوانییە ڕایدەگەیێنن، ئەمڕۆ یەکشەممە، لە قەزای بدیر لە دیوانییە گەنجێک دوای ئازادکردنی لە زیندان دایک و باوک و براژنە دووگیانەکەی دەکوژێت و پاشان لەلایەن برایەکیەوە دەکوژرێت، بەمەش پێنج کەس لە خانەوادەیەکدا گیانیان لەدەستدا.

ئەوەی پێویستە بیزانیت: لە ناوەڕاستی مانگی ڕابردوو هەر لە پارێزگای دیوانییە، ژنێک بە شێوەیەکی زۆر دڕندانە هەستا بە کوشتنی دایک و باوک و خوشکی هاوسەرەکەی.

ئەمەش بزانە: پێشتر لە مانگی تەمموزی ئەمساڵ وەزارەتی ناوخۆی عێراق ڕایگەیاندبوو لە نیوەی یەکەمی ئەمساڵدا ڕێژەی تاوانەکان بە شێوەیەکی بەرچاو کەمیکردووە.