ئاڤا ناوی 10 کاندیدی پۆستی سەرۆکوەزیرانی عێراق ئاشکرا دەکات

ئاڤا نیوز

 

سەرچاوەیەکی سیاسی ئاگادار لەنێو چوارچێوەی هەماهەنگی ئاشکرای دەکات، سەرکردەکانی چوارچێوەی هەماهەنگی سەرقاڵی تاوتوێکردنی لیستێکی 10 کەسین وەک کاندید بۆ پۆستی سەرۆکوەزیرانی داهاتووی عێراق.

 

ئەوەی پێویستە بیزانیت: بەگوێرەی نەریتی سیاسی لە دوای ڕووخانی ڕژێمی پێشوو لە ساڵی 2003، سێ سەرۆکایەتییەکەی عێراق بەرکەوتەی سێ پێکهاتە سەرەکییەکەی عێراق (کورد، سوننە و شیعە)ـەیە، بەجۆرێک سەرۆککۆمار بۆ کورد، سەرۆکی پەرلەمان بۆ سوننە و سەرۆکوەزیرانیش بۆ شیعەکان دەبێت.

 

زانیاریی بەدەستهاتوو: بەگوێرەی زانیارییەکان، لیستەکە لەم ناوانە پێکهاتووە:
1- حەیدەر عەبادی، سەرۆکوەزیرانی پێشووتری عێراق.
2- محەممەد شیاع سوودانی، سەرۆکوەزیرانی ئێستای عێراق .
3- قاسم ئەعرەجی، ڕاوێژکاری ئاساییشی نیشتمانی عێراق.
4- حەمید شەتری، سەرۆکی دەزگای هەواڵگریی عێراق.
5 عەلی شوکری، سەرۆکی دەستەی ڕاوێژکاری سەرۆکایەتیی کۆمار.
6- باسم بەدری، سەرۆکی دەستەی لێپرسینەوە و دادپەروەری.
7- محەممەد تۆفیق عەلاوی، وەزیری پێشووتری پەیوەندییەکانی عێراق .
8- ئەسعەد عیدانی، پارێزگاری ئێستای بەسرە.
9- عەبدولحسێن عەبتان، وەزیری پێشووتری وەرزش و لاوانی عێراق.
10- عەبدولئیلاه نائیلی، سەرۆکی دەستەی شەهیدانی عێراق .

 

زانیاریی زیاتر: هەمان سەرچاوە ئاماژەی بەوەش کردووە، چوارچێوەی هەماهەنگی بەنیازە لەنێو ئەم لیستەدا تەنیا سێ کاندید هەڵبژێرێت و یەکلایی بکاتەوە، دواتر ئەو سێ ناوە ئاراستەی هێز و لایەنە سیاسییەکانی دیکە بکات بە مەبەستی وەرگرتنی ڕا و سەرنجیان، پێش ئەوەی لەسەر کاندیدی کۆتایی و تەوافوق و ڕێککەوتن بکرێت.

 

ئەوەی لەبارەیەوە دەگوترێت؛ مشعان جبووری، سیاسەتەمەداری عێراق پێی وایە باشترین بژاردە بۆ پۆستی سەرۆکوەزیران ئەوەیە چوارچێوەی هەماهەنگی کەسێک کاندید بکات لە دەرەوەی خۆیان بێت و هاوکات جێگەی ڕەزامەندیی سەدر و واشنتنیش بێت.