بۆ یەکەمجار ئاوازی گەنجێکی کورد لەلایەن ژەنیارێکی بەناوبانگی ئەمریکییەوە دەژەنرێت

ئاڤا نیوز

 

لە هەوڵێکدا بۆ بەجیهانیکردنی هونەری کوردی، گەنجێکی شاری سلێمانی پارچە میوزیکێک بەناوی "کوردیش سمفۆنیا" دەنووسێتەوە و لەلایەن ژەنیارێکی بەناوبانگی ئەمەریکییەوە بەناوی کوردستانەوە لەو وڵاتە پێشکەش دەکرێت.

 

چیرۆکی سەرەکی؛ "ژەنیار ئارام"، هونەرمەندێکی تەمەن 25 ساڵی خەڵکی شاری سلێمانییە و خاوەنی بیرۆکە و نووسینەوەی ئەم بەرهەمە هونەرییەیە. ژەنیار لە لێدوانێکیدا بۆ ژیوار عەبدولڕەحمان، پەیامنێری ئاڤا، ڕایگەیاند: "دەمێک بوو خەونی ئەوەم هەبوو پارچە میوزیکێکی جیهانی بەناوی کوردستانەوە بنووسمەوە بۆ ئەوەی ناوی وڵاتەکەم لە جیهاندا ئاشنا بکەم، خۆشبەختانە توانیم ئەو خەونە بەدی بهێنم."

 

میوزیکەکە تێکەڵەیەکە (Fusion) لەنێوان دوو پارچە میوزیکی فۆلکلۆری ڕەسەنی کوردی و پارچە میوزیکێکی کلاسیکی جیهانی. ئەوەی جێگەی سەرنجە، ژەنیار ئارام ئەم بەرهەمەی بۆ ئامێری "ئۆرگن" نووسیوەتەوە، کە بە وتەی خۆی "ئەم ئامێرە لە تەواوی عێراق و هەرێمی کوردستاندا بوونی نییە."

 

زانیاریی زیاتر؛ دوای ئامادەکردنی بەرهەمەکە، ژەنیار نۆتەکانی ناردووە بۆ "لیا کۆفمان"، کە ژەنیارێکی بەناوبانگی ئەمەریکایە.  لیا نۆتەکانی زۆر بەدڵ بووە و بە شانازییەوە لەبەردەم هاوڕێ و میوزیکژەنانی دیکەی ئەمەریکیدا، پارچە میوزیکەکەی بەناوی "کوردستان"ـەوە پێشکەش کردووە.

 

ئەو گەنجە هونەرمەندە هیوای خواست کە ئامێری ئۆرگن بهێنرێتە هەرێمی کوردستان، تاوەکو لەو ڕێگەیەوە بتوانرێت خزمەتی زیاتر بە میوزیکی کوردی بکرێت و هەنگاوی کردەیی بۆ بەجیهانیکردنی بنرێت.