داتای هەنگەوانانی كوردستان بەدیجیتاڵی دەكرێت

ئاڤا نیوز

لە چوارچێوەی پرۆژەی بەخێوكردن و پەرەپێدانی هەنگ و بەدیجیتاڵكردنی داتای هەنگەوانان، ئەپڵیكەیشنێكی مەیدانی بۆ كۆكردنەوەی داتای هەنگەوانانی سلێمانی وەک قۆناغی یەكەم ئامادە دەكرێت، لە ئاییندەیەكی نزیكیشدا هەموو هەرێمی كوردستان دەگرێتەوە.

چیرۆكی سەرەكی: وەزارەتی كشتوكاڵ و سەرچاوەكانی ئاوی هەرێمی كوردستان، بەهەماهەنگی نوێنەری ڕێكخراوی خۆراک و كشتوكاڵ (فاو)، وۆركشۆپێكی دوو ڕۆژەی ئەنجامدا بۆ پاڵپشتیكردن و پەرەپێدانی داتای دیجیتاڵی لە كەرتی هەنگەوانیدا.

ڕاگەیێنراوی فەرمی: وەزارەتی كشتوكاڵ و سەرچاوەكانی ئاو لە ڕاگەیێنراوێكدا ئاماژەی بەوە كردووە، وۆرکشۆپەکە لەپێناو بەرزكردنەوەی تواناکانی کۆکردنەوەی زانیاری و ڕاپرسی مەیدانی بوو، لەو چوارچێوەیەشدا بەشداربووان بە شێوازی نوێی فۆرمی ڕاپرسیی هەنگەوانی و بونیادنانی كارامەیی دیجیتاڵی ئاشنا كران.

بابەتە ستراتیژییەكە: كارمەندانی كۆكردنەوەی ئامار لە وەزارەتی كشتوكاڵ، بە بەكارهێنانی پلاتفۆرمی 'كۆبۆ توولبۆكس' ئاشنا دەكرێن، كە ئەپڵیكەیشنێكی مەیدانییە بۆ كۆكردنەوە و بەدیجیتاڵكردنی داتا، وەک نموونەش، لە قۆناغی یەكەمدا هەنگەوانانی سلێمانی داتا دەكرێن و لە ئاییندەیەكی نزیكیشدا هەموو هەرێمی كوردستان دەگرێتەوە.

ئەوەی پێویستە بیزانیت: هەنگوینی كوردستان، بە یەكێك لە بەرهەمە هەرە باشەكانی ناوخۆی عێراق و جیهان ئەژمار دەكرێت، دوای دەسپێشخەرییەكەی سەرۆكوەزیران مەسرور بارزانی بۆ ساغكردنەوەی بەرهەمی جووتیارانی كوردستان، ئێستا جگە لە ناردنی بۆ بازاڕەكانی ناوخۆی كوردستان و عێراق، هەناردەی وڵاتانی دەرەوەش دەكرێت.