چەندین سەرپێچیكار لە سلێمانی لەسەر داربڕین دەستگیر دەكرێن

ئاڤا نیوز

پۆلیسی دارستان و ژینگە لە ناوچە جیاوازەكانی پارێزگای سلێمانی، هەڵمەتێكی فراوانی بۆ بنبڕكردنی دیاردەی داربڕین دەستپێكردووە، تەنیا لە مانگی یەكەمی ساڵی نوێدا، زیاتر لە 10 سەرپێچیكار بە تۆمەتی داربڕین دەستگیركراون كە تەمەنی بەشێك لەو دارە سروشتییانەی بڕاونەتەوە 70 بۆ 80 ساڵ دەبێت.

چیرۆکی سەرەکی: بەڕێوەبەرایەتیی پۆلیسی دارستان و ژینگەی پارێزگای سلێمانی، لەپێناو پاراستنی سامانی سروشتی و ژینگەی کوردستان سەرجەم بنكەكانی پۆلیسی دارستان و ژینگەی ڕاسپاردووە لەڕێگەی مەفرەزەكانییەوە سەرپێچیكارانی سەر ژینگە بدۆزنەوە و ڕێككاری یاسایی لەدژیان بگرنە بەر.

لێدوانی فەرمی: عەقید هێمن كەمەرخان، وتەبێژی پۆلیسی دارستان و ژینگەی پارێزگای سلێمانی بە ئاڤای ڕاگەیاند، مەفرەزەكانی بنكەی پۆلیسی دارستان و ژینگەی بازیان، لەماوەی 24 كاتژمێردا، توانییان سێ سەرپێچیکار دەستگیر بكەن و دەستیش بگرن بەسەر ئەو دارانەی بڕدراون كە لەجۆری داربەڕوو ـن و تەمەنی بەشێك لە دارەكان دەیان ساڵە. چەند ڕۆژێك لەمەوبەریش لەسنووری گوندی داری كەلی سەر بە بازیان دوو تۆمەتباری دیكە لەسەر داڕبڕین دەستگیركران و پەڕاوی لێكۆڵینەوە بۆ سەرجەمیان كراوەتەوە.

ئاماژەی بەوەشکرد، چەند ڕۆژێک لەمەوبەریش مەفرەزەیەكی پۆلیسی دارستانی قەرەداغ، پاش گەڕان و كێوماڵكردنی سنوورەكە بە درۆن و پیادە، لەئەنجامدا لە سنووری گوندی دێلێژە و تافان، 21 بنەدار بەدیكران كە پێشتر بڕاونەتەوە و سەرپێچیكاران نادیار بوون، پاش لێكۆڵینەوە و بەدواداچوون توانرا تۆمەتبارەكان بدۆزرێنەوە و ڕادەستی یاسا بكرێن. هەروەها لە سنووری گوندی گوڕباز، کورەیەکی خەڵوزکردن تێکدرا، دواتر خاوەنەکەی خۆی ڕادەستی بەشی پۆلیسی دارستانی قەرەداغ کرد و پەڕاوی لێکۆڵینەوەی بۆ کرایەوە.

لەلایەکی دیکەوە: دوای دەسكەوتنی هەواڵ و زانیاری لەسەر ڕووداوێكی داربڕین لە سنووری گوندی میرەدێ سەر بە ناحیەی زەڕایەن، كارمەندانی بنكەی پۆلیسی دارستان و ژینگەی زەڕایەن سێ كەسیان بە تۆمەتی بڕینی داری سروشتی دەستگیركرد و پەڕاوی لێكۆڵینەوەیان بۆ كراوەتەوە و ڕادەستی دادوەری لێكۆڵینەوە كراون.

٠ لە گوندی چنارانی سەر بە ناحیەی خدران، چەند كەسێكی نەناسراو ژمارەیەک داری سروشتییان بڕیوە و هێشتا دەستگیر نەكراون.

٠ لە گوندی قازان سەر بە قەزای پیرەمەگروون، مەفرەزەكانی بنكەی پۆلیسی دارستان و ژینگەی ئەو شوێنە، سەرپێچیكارێکیان بە تۆمەتی داربڕین دەستگیر کرد.