هەسەدە: سوپای سووریا هێرش دەکاتە سەر گوندەوارەکانی حەسەکە و لە کۆبانێش بۆردوومان بەردەوامە

ئاڤا نیوز

سەرەڕای ڕاگەیاندنی درێژکردنەوەی ئاگربەست بۆ ماوەی 15 ڕۆژ، گرووپە چەکدارەکانی سەر بە سوپای عەرەبیی سووریا هێرشەکانیان بۆ سەر گوندەوارەکانی حەسەکە و کۆبانی تووندتر کردووەتەوە و تا ئێستا زیاتر لە 20 جار ڕێککەوتنەکەیان پێشێل کردووە.

ڕاگەیێنراوی فەرمی: ناوەندی ڕاگەیاندنی هێزەکانی سووریای دیموکرات "هەسەدە" لە ڕاگەیێنراوێکدا ئاماژە بەوە دەدات، لە گوندی "خەراب عەشک"ـی باشووری ڕۆژهەڵاتی کۆبانی، بەهۆی بۆردومانی گرووپە چەکدارەکانەوە، کۆمەڵکوژییەک بەرامبەر خێزانی "بۆزان" ئەنجامدرا، کە تێیدا 5 کەس شەهید بوون و 5ـی دیکەش برینداربوون، هاوکات هێرشەکان بۆ سەر گوندی جەلەبییە بە هەمان شێوە بەردەوامییان هەیە.

هەر بەگوێرەی ڕاگەیێنراوەکە، لە باشووری حەسەکە، فڕۆکە بێفڕۆکەوانەکانی سەر بە دیمەشق گوندی "مەیلەبییە"یان کردە ئامانج و بووە هۆی برینداربوونی 3 هاووڵاتیی مەدەنی. هەروەها لە گوندی "سەفا"ـی باشووری چل ئاغا پێکدادانی تووند بەردەوامە.

زانیاریی زیاتر: هەسەدە ڕایدەگەیێنێت کە ئەوان پابەندی پاراستنی مەدەنییەکانن، بەڵام بەردەوامیی ئەم پێشێلکارییانە و بەئامانجگرتنی ڕاستەوخۆی ماڵ و موڵکی هاووڵاتییان، مەترسییەکی گەورە بۆ سەر سەرکەوتنی هەوڵە دیپلۆماسییەکان و ڕێککەوتنی 18ـی کانوونی دووەم دروست دەکات.