بڕیارێک لە وەزارەتی گواستنەوە و گەیاندن بۆ پەخشی کەناڵە ناوخۆییەکان و کۆمپانیاکانی ئیتەرنێت

ئاڤا نیوز

وەزارەتی گواستنەوە و گەیاندن ئاگاداری کەناڵە ناوخۆییەکان دەکات، کە لەماوەی یەک مانگدا پەخشی کەناڵەکانی "بین سپۆڕت" دەوەستێت، هەر کەناڵێک بیەوێت یارییەکان لەو کەناڵانە وەرگرێتەوە دەبێت ڕەزامەندی ئەو دامەزراوەیە بەدەست بهێنێت.

وێنە گەورەکە: گرووپی کەناڵەکانی بین سپۆڕت، مافی پەخشی بەشێکی زۆری خولەکانی جیهانیان کڕیوەتەوە، هەر کەناڵێک بیەوێت یارییەکانی ئەو خولانە پەخش بکات لە ڕۆژهەڵاتی ناوەڕاست و باکووری ئەفریقا دەبێت لە بین سپۆڕتی بکڕێتەوە، لەماوەی ڕابردوودا کەناڵە ناوخۆییەکانی هەرێمی کوردستان بەبێ ڕەزامەندی یارییەکانیان لەڕێگەی ئایپی ئۆنلاینەوە وەرگرتووە و پەخشیان کردووەتەوە.

لێدوانی فەرمی: دیلان ڕەشاد، وتەبێژی وەزارەتی گواستنەوە و گەیاندن بە ئاڤای گوت، "هەموو کۆمپانیاکانی بواری ئینتەرنێت ئاگادار کراونەتەوە بە ڕاگرتنی پەخشی کەناڵەکانی بین سپۆڕت، لە ڕێگەی پەخشی ئۆنلاین کە هەندێک کەناڵ بەشێوازی( IPTV )  هەندێک کەناڵی ناوخۆییەکان بە نایاسایی پەخش دەکرێن."

زانیاریی زیاتر: هەر کەناڵێکی ناوخۆ بیەوێت یارییە جیهانییەکان لە بین سپۆڕت وەرگرێت، دەبێت ڕەزامەندی ئەو دامەزراوەیە لەڕێگەی نوێنەرایەتیان لە هەرێمی کوردستان بەدەستبهێنێت، بەپێچەوانەوە ئای پی تیڤی بلۆک دەکرێت و ناتوانێت پەخشی یارییەکان بکات.

ئەوەی پێویستە بیزانیت: بین سپۆڕت بە بڕە پارەیەکی زۆر مافی پەخشی یاریی خولە بەهێزەکانی ئەوروپا و جیهانی وەرگرتووە، بەگوێرەی هەلومەرجی جیاواز لە ڕۆژهەڵاتی ناوەڕاست و باکووری ئەفریقا یارییەکان دەفرۆشێت، ساڵانە مافی پەخشکردنی یارییەکانی خولی فەڕەنسا 80 بۆ 100 ملیۆن یۆرۆ دەکات، بۆ هەر وەرزێک 10 هەتا 50 ملیۆن یۆرۆ لەو کەناڵە وەردەگرێت.

ئەمەش بزانە: ئەگەر عێراق بە نموونە وەربگیرێت بۆ هەر وەرزێک بەو مەرجەی هەفتەی دوو یاریی خولەکە پەخش بکات، دەبێت چوار ملیار و نیو بۆ 13 ملیار دینار بە بین سپۆڕت بدات.