چاکسازی و پاکسازی لە دۆسییە و مووچەی کەمئەندامانی سەنگەر دەکرێت

ئاڤا نیوز

 

چاکسازی لە دۆسیەی کەمئەندامانی سەنگەر دەکرێت و هەموویان دەخرێنە سەر وەزارەتی پێشمەرگە، بەشێوەیەک کەمئەندامانی سەنگەر بە سەدا 100ی مووچەکەیان و ڕێژەی کەمئەندامییەکەیان خانەنشین دەکرێن.

وێنە گەورەکە: لە هەموو هەرێمی کوردستان نزیکەی 10 هەزار و 500 کەمئەندامی سەرنگەر هەیە، 8 هەزار و 192 هی یەکەکانی حەفتا و هەشتان، زیاتر لە دوو هەزار هی وەزارەتی پێشمەرگەن، زێرەڤانی و بەرگریی فریاکەوتن هەریەکەیان زیاتر لە 100 کەمئەندامی سەنگەریان هەیە.

لێدوانی فەرمی: لیوا حاجی مەلا ئەمین، بەڕێوەبەری گشتیی خانەنشینی پێشمەرگە و کەمئەندامان بە ئاڤای گوت: سێ هەزار و 371 دۆسیە تەواوکراون تەنها ئیمزای وەزیری پێشمەرگە ماوە، 4 هەزار و 821 دۆسیەش ئێستا کاریان لەسەر دەکرێت، بەڵام لەو ژمارەیە 593 کەمئەندامی یەکەی 70 و 11 کەمئەندامی یەکەی 80 هێشتا دۆسیەکانیان بۆ وەزارەت نەنێردراوە. 

ئەو کەمئەندامانە پێشتر مووچەیان بۆ بەستراوە و مووچە وەردەگرن، بەڵام لەمەودوا دەگوازرێتەوە سەر وەزارەتی پێشمەرگە، ئەگەر هەڵەیەک یان کەموکوڕییەکیش لە دۆسیەکانیان هەبێت چاک دەکرێت و دەستکاری مووچەیان دەکرێت.

کەمئەندامی سەنگەر بە سەدا 100ی مووچەکەی و ڕێژەی کەمئەندامییەکەی خانەنشین دەکرێت، بۆنموونە کەمئەندامێک دوایین مووچەی ملیۆنێک دینار بووە، ڕێژەی کەمئەندامیشی سەدا 80یە، بە مووچەی ملیۆنێک و 800 هەزار دینار خانەنشین دەکرێت. ئەگەر پێشتر کەمتر یان زیاتر لەو مووچەیەی وەرگرتبێت، ئەوا دەستکاری دەکرێت.

زانیاریی زیاتر: کۆتایی ئەمساڵ وەکو دوایین مۆڵەت دیاریکراوە لەلایەن بەغداوە، دەبێت دۆسیەی خانەنشینان و کەمئەندامانی پێشمەرگە هەمووی یەک بخرێت.