لە نزیک کۆشکی سپی تەقە لە ژمارەیەک سەربازی ئەمریکا دەکرێت و کوژراو و بریندار هەیە

ئاڤا نیوز

بەپێی زانیاریی دوو سەرچاوەی ئاگادار، دوو سەربازی ئەمریکی کە جلی فەرمیان لەبەردابووە لە ناوەندی شاری واشنتن و تەنیا چەند شەقامێک دوور لە کۆشکی سپی تەقەیان لێکراوە.

بڵاوکراوەی فەرمی: پۆلیسی شاری واشنتن ڕایگەیاند، هێزەکانیان لە شوێنی ڕووداوەکەن، داواشیان لە هاووڵاتیان کردووە لە شوێنەکە دوور بکەونەوە.

ئاماژەیان بەوەشکردووە، ئەو کەسەی تەقەی لە دوو سەربازە ئەمریکییەکە کردووە، دەستگیرکراوە.

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند، "ئەو نامرۆڤەی تەقەی لە دوو سەربازەکە کردووە بە تووندی باجی کارەکەی دەدات و دوو سەربازەکە بە سەختی برینداربوون و لە دوو نەخۆشخانەی جیا چارەسەر وەردەگرن، خوای گەورە هەموو سەربازانمان بپارێزێت."

لەلایەکی دیکەوە: کارۆلین لیڤیت، وتەبێژی کۆشکی سپی ڕایگەیاند، سەرۆک ترەمپ ئاگاداری ڕووداوەکەیە و کۆشکی سپی بۆ ماوەیەکی کاتی داخراوە و لە نزیکەوە چاودێری بارودۆخەکە دەکەین.