وەزیری پلاندانان: ڕێژەی دانیشتووانی هەرێمی کوردستان زیاترە لەو ڕێژەیەی کە هەیە

ئاڤا نیوز

وەزارەتی پلاندانانی هەرێمی کوردستان ڕوونکردنەوە لەسەر ڕێژەی دانیشتووانی هەرێمی کوردستان لەسەر ئاستی عێراق دەدات و دەڵێت، بەشێکی قەزا و ناحییەکان لەسەر پارێزگاکانی عێراق هەژمارکراون.

 

چیرۆکی سەرەکی: ڕۆژی چوارشەممە، 27-11-2025، وەزارەتی پلاندانانی عێراق ئەنجامەکانی سەرژمێری گشتیی دانیشتووان و خانووبەرەی عێراقی بەگوێرەی پۆلێنبەندییەکان بۆ هەر پارێزگایەک و شار و شارۆچکەیەک بۆ ساڵی 2024 بڵاو کردەوە، ڕێژەی دانیشتووانی هەرێمی کوردستان شەش ملیۆن و 519 هەزار و 129 هاووڵاتییە، بەڵام وەزارەتی پلاندانانی هەرێمی کوردستان دەڵێت ڕێژەکە زیاترە.

 

لێدوانی فەرمی: دارا ڕەشید، وەزیری پلاندانانی هەرێمی کوردستان لە کۆنگرەیەکی ڕۆژنامەوانیدا گوتی، "هەرێمی کوردستان 14.136%ـی ڕێژەی دانیشتووانی عێراق پێکدەهێنێت، بەڵام ئەگەر شێخان و چەند ناحیەکی دیکە لەسەر پارێزگاکانی عێراق هەژمار نەکرانایە، ڕێژەکە دەبوویە 15.5%."

 

ئەمەش بزانە: بەگوێرەی داتای وەزارەتی پلاندانانی هەرێمی کوردستان ناوچەکانی قەزای شێخان، فایدێ، زەلکان لە سنووری دهۆک و هەروەها دیبەگە، گوێڕ و مەلاقەرە لە هەولێر لەسەر مووسڵ هەژمارکراون، ناحیەی کۆکس لە ئیدارەی سەربەخۆی گەرمیان لەسەر دیالە هەژمار کراوە.

 

گۆشەیەکی دیکەی دیمەنەکە: بەگوتەی وەزیری پلاندانانی نزیکەی 500 ملیار دینار بۆ سەرژمێری لە عێراق تەرجانکرابوو، بەڵام تەنیا 12 ملیار بەر هەرێمی کوردستان کەوتووە.