نۆژەنكردنەوەی سایدی چوون لە هەولێرەوە بۆ خەبات دەستپێدەكات؛ پێنج مانگ دادەخرێت

ئاڤا نیوز

 

دوای تەواوبوونی كارەكانی نۆژەنكردنەوەی سایدی هاتن لە قەزای خەباتەوە بۆ شاری هەولێر و كردنەوەی بەڕووی شۆفێراندا، لە ئەمڕۆ شەممەوە دەست دەكرێت بە نۆژەنكردنەوەی سایدی چوون لە هەولێرەوە بەرەو خەبات؛ ڕێگاكە 150 ڕۆژ بەڕووی شۆفێران دادەخرێت.

 

وێنە گەورەكە: شەقامی دووسایدی هەولێر-خەبات بە یەكێك لە شەقامە گرنگ و ستراتیژییەكانی پارێزگای هەولێر دادەنرێت و بەهۆی گرنگیی ناوچەكە، فشارێكی زۆری هاتووچۆی لەسەرە، بۆیە لەماوەی ڕابردوودا شەقامەكە چەندین جار تێكچووە و چاڵ و تاسەی گەورەی لێ دروستبووە، بەهۆیەوە چەندین ڕووداوی هاتووچۆی كارەساتباری لێ ڕوویدا، بەشێك لە هاووڵاتیان بە شەقامی مەرگ ناوی دەبەن.

 

لێدوانی فەرمی: ئەندازیار دڵزار بەكر، سەرپەرشتیاری نۆژەنكردنەوەی شەقامی هەولێر - خەبات، تایبەت بە ئاڤا ڕایگەیاند، ئەمڕۆ بە هەماهەنگیی لەگەڵ بەڕێوەبەرایەتیی هاتووچۆی هەولێر و كۆمپانیای جێبەجێكاری پرۆژەكە، سایدی چوون بەرەو قەزای خەبات دادەخرێت، و دەست دەكرێت بە نۆژەنكردنەوەی ڕێگاكە، بەدیاریكراوی؛ لە بازاڕی عەلوەوە تاوەكو بازگەی كۆنی كانی قڕژاڵە، بە مەودای پێنج كیلۆمەتر دادەخرێت.

 

زانیاریی زیاتر: سەرپەرشتیاریی پرۆژەكە ئاماژەی بەوەشكرد، گوژمەی تەرخانكراو بۆ پرۆژەكە پێنج ملیار دینارە، لەسەر بودجەی پەرەپێدانی پارێزگای هەولێر، ماوەی 150 ڕۆژ بە كۆمپانیای جێبەجێكار دراوە كە كارەكانی نۆژەنكردنەوەی شەقامەكە تەواو بكات، كۆمپانیا بەڵێنی داوە تاوەكو سەرەتای مانگی ئاداری ساڵی داهاتوو، سەرجەمی كارەكانی تەواو بكات، بە لەبەرچاوگرتنی ڕێنماییە ئەندازەییەكان و دەرخستەی پرۆژەكە، هاوكات بەڵێنیشی داوە، باشترین كوالێتی كاركردن لە نۆژەنكردنەوەی شەقامەكە بەكاربهێنێت بە بەكارهێنانی دوو چین قیڕ، لەپێناو ئەوەی ڕێگاكە تێكنەچێتەوە.

 

ئەوەی پێویستە بیزانیت: سەرپەرشتیاری پرۆژەكە لەڕێگەی ئاڤاوە پەیامی بە هاووڵاتیان و شۆفێران گەیاند، كە دەتوانن ڕێگاكانی گوێڕ و ڕەشكین وەكو ڕێگەی جێگرەوە بەكاربهێنن.