ئیمانوێل ماکڕۆن سەردانی پەکین دەکات

ئاڤا نیوز

سەرۆکی فەرەنسا بڕیارە سبەی چوارشەممە، چوارەمین سەردانی فەرمی خۆی بۆ چین ئەنجام بدات و لەگەڵ شی جین پینگ هاوتا چینییەکەی کۆببێتەوە.

زانیاریی بەدەستهاتوو: ئیمانوێل ماکرۆن سەرۆکی، فەرەنسا لە نێوان ڕۆژانی 3 بۆ 5 ئەم مانگە بەرەو چین بەڕێ دەکەوێت، بڕیارە ڕۆژی پێنجشەممە لە پەکینی پایتەختی وڵاتەکە لەگەڵ شی جین پینگ سەرۆکی وڵاتەکە کۆببێتەوە، سەرچاوە فەرەنسییەکان دەڵێن، سەردانەکە دەرفەتێک بۆ لایەنی فەرەنسی و چین دەڕەخسێنێت بۆ ئەوەی پرسە سەرەکییەکان و هاوبەشی ستراتیژی نێوان فەرەنسا و چین بەهێز بکەن.

پرسە گرنگەکانی نێوان هەردوو وڵات ئەمانەن:
   
شەڕی ڕووسیا و ئۆکراینا: یەکێک لە پرسە سەرەکییەکان پرسی شەڕی ئۆکراینایە، چونکە پاریس هیوادارە چین بتوانێت ڕووسیا ڕازی بکات و کاریگەری لەسەر دروست بکات بۆ ئەوەی بە ئاگربەست ڕازی بێت، ئەمەش لە کاتێکدایە دوێنی دووشەممە لەکۆشكی ئێلێزی ماکڕۆن، پێشوازی لە ڤۆلۆدێمیر زێلێنسکی هاوتا ئۆکراینییەکەی کرد.

ململانێی چین و ئەمریکا

ئەمە بابەتێکی دیکە کە ڕاستەوخۆ پەیوەندی بە پاریسەوە هەیە لە پەیوەندییەکانی لەگەڵ چیندا، ئەوروپییەکانیش دەگرێتەوە، ئەوان دەیانەوێت خۆیان بەدوور بگرن بۆ ناو ململانێی ئەمریکا و چین بەتایبەت لەگەڵ زیادبوونی فشارەکانی بازرگانی جیهانی بەهۆی ئەو باجانەی کە واشنتن سەپاندوویەتی.

پرسی ئابووری

فەرەنسا دەڵێت، لەم سەردانەدا ماکرۆن هەڵگری "ئەجێندایەک دەبێت بۆ هاوکاری و گەیشتن بە هاوسەنگی لە بواری ئابووری و بازرگانیدا، چونکە وا بڕیارە فەرەنسا میوانداری گرووپی حەوت دەکات بۆ ساڵی داهاتوو.