تیمێکی چاودێریی دارایی عێراق دوو هەفتە لە کوردستان دەمێننەوە

ئاڤا نیوز

 

تیمێکی چاودێریی دارایی عێراق بۆ وردبینیی لە خەرجی و داهاتەکانی حکومەتی هەرێمی کوردستان لە هەولێرن و بڕیارە پێداچوونەوە بە خەرجی و داهاتەکانی شەش مانگی ڕابردوو بکەن.

 

هۆکارە زانراوەکان: ئامانجی هاتنی سەردانەکە ئەوەیە داهاتی نەوتی و نانەوتی، خەرجییەکانی حکومەت لە شەش مانگی ڕابردوو هەموویان پێداچوونەوەی بۆ دەکەن. بەپێی ڕێکەوتنی هەولێر و بەغدا، وەرز وەرز تیمەکە سەردانی هەولێر دەکەن، بەڵام ئەمساڵ ئەمە تەنها دووەمجارە سەردانی هەولێر بکەن، کۆتایی مانگی دووی ئەمساڵ کە هاتن سێ هەفتە مانەوە.

 

ئەوەی پێویستە بیزانیت: ئێستا تیمەکەی چاودێریی دارایی عێراق بۆ وردبینیی لە خەرجی و داهاتەکانی حکومەتی هەرێمی کوردستان لە هەولێرن. لیژنەکە گەورەیە و زیاتر لە 15 کەسن، سبەی چوارشەممە دەستبەکار دەبن، بڕیارە بۆ ماوەی دوو هەفتە بمێننەوە، پێداچوونەوە بە خەرجی و داهاتەکانی شەش مانگی ڕابردوو دەکەن، دەچنە خەزێنەکان و وەزارەتەکان.

 

بۆچی گرنگە: هاتنی ئەو تیمە گرنگە، ئیدی عێراق دڵنیا دەبێتەوە کە هەموو خەرجی و داهاتەکان هیچ کێشەیەکیان نییە، بۆ ئەوەی چیتر بیانوو بۆ ناردنی مووچە و بودجە دروست نەکەن.

 

لەلایەکی دیکە: لەبارەی مووچەی مانگی 10 لیست دەمێکە نێردراوە، میزان مراجەعەش تەواو کراوە. هەروەها داهاتی نانەوتی مانگی 10 بەهەمانشێوە بە کاش ئامادەیە و هیچ کێشەیەکی نییە.

 

دابەشکردنی مووچەی مانگی نۆ کۆتایی هاتووە. تەنیا مووچەی مامۆستایانی گرێبەستی وەزارەتەکانی پەروەردە و خوێندنی باڵا ماوە، هی ئەوانیش سبەی و دووسبەی، چوارشەممە و پێنجشەممە دابەش دەکرێت. ئەوەی ماوەتەوە سێ مووچە ماون. مووچەی مانگی 10 کۆتایی ئەم مانگە دەنێردرێت و کێشەی نییە. دوو مووچەی کۆتایی ساڵ دەکەونە ساڵی داهاتوو، بەڵام نازانرێت چۆن دەدرێن.

دەست بە ئامادەکردنی لیستی مووچەی مانگی یانزەش کراوە، هەفتەی داهاتووش دەست بە میزان مراجەعە و کۆکردنەوەی داهاتی ناوخۆی مانگی 11 دەکرێت.