لە بڕۆکسل گفتوگۆ دەربارەی ستانداردە نێودەوڵەتییەکانی حکومڕانیی هەرێمی کوردستان دەکرێت

ئاڤا نیوز

‎لە شاری بڕۆکسلی پایتەختی بەلجیکا، بڕیاروایە ڕێکخەری ڕاسپاردە نێودەوڵەتییەکان لەگەڵ بەرپرسانی باڵای یەکێتیی ئەورووپا، تاوتوێی ستانداردی نێودەوڵەتیی کارەکانی دامودەزگا حکومییەکانی هەرێمی کوردستان بکەن.

‎وێنە گەورەکە: بەمەبەستی بەدەستهێنانی پشتیوانیی زیاتر بۆ حوکمڕانییەکی باش و خستنەڕووی شێوازی حکومڕانی لە هەرێمی کوردستان و پەیڕەوکردنی ستانداردە نێودەوڵەتییەکان لە ستراتیژیەت و ڕاپەڕاندنی ئەرکی دامودەزگا حکومییەکان، لە ڕۆژانی 8 تاوەکو 11ی کانوونی یەکەمی 2025، ڕێکخەری ڕاسپاردە نێودەوڵەتییەکانی حکومەتی هەرێمی کوردستان لە شاری بڕۆکسلی پایتەختی بەلجیکا، بەشدار دەبێت لە زنجیرە کۆبوونەوەیەک لەگەڵ بەرپرسانی باڵای یەکێتیی ئەورووپا و ئەندامانی پەرلەمانی ئەوروپا.

‎لێدوانی فەرمی: د. دیندار زێباری، ڕێکخەری ڕاسپاردە نێودەوڵەتییەکانی حکومەتی هەرێمی کوردستان بە ئاڤا میدیای ڕاگەیاند: لە دیدارەکاندا ئەو پێشکەوتنانەی حکومەتی هەرێمی کوردستان دەخەینەڕوو کە لە بواری مافەکانی مرۆڤ بەدەستیهێناوە وەک؛ جێبەجێکردنی ڕاسپاردە نێودەوڵەتییەکان و پلانی حکومەتی هەرێمی کوردستان بۆ مافەکانی مرۆڤ (2021-2025) کە لە 62%ی ڕاسپاردە نێودەوڵەتییەکانی جێبەجێکردووە، ئەمەش هەموو ئەو بابەتانە لەخۆدەگرێت کە لە هەموو ڕەهەندێکەوە پەیوەستن بە مافی مرۆڤ.