مەرجەعی عەلەوییەکانی سووریا بانگەوازی مانگرتنی سەرانسەری دەکات

ئاڤا نیوز

 

مەرجەعی باڵای عەلەوییەکانی سووریا دەڵێت، ئێستا بەناوی ئازادییەوە ستەم لە خەڵکی وڵات دەگرێت و هەوڵی بێدەنگکردنیان دەدرێت، بۆیەش وەک ناڕەزاییەک بەرامبەر ئەو دۆخە داوا دەکات، خەڵک بۆ ماوەی پێنج ڕۆژ مانبگرن و لە ماڵەکانیاندا بمێننەوە.

 

چیرۆکی سەرەکی: سەرلەبەیانیی ڕۆژی 8ـی 12ـی ساڵی 2024 و دوای 53 ساڵ لە حوکمی باوکی و دواتر خۆی، دەسەڵاتی بەشار ئەسەد ڕووخا و ناوبراو بەرەو ڕووسیا هەڵهات بەوەش قۆناغێکی نوێ لە سوریا دەستی پێکرد، بۆ یەکەم ساڵیادی ڕووخانی دەسەڵاتی بەعسیش، ئەحمەد شەرع سەرۆکی سووریا داوای لە سەرجەم خەڵکی وڵاتەکەی کردووە لەو ڕۆژەدا بچنە سەر شەقام و ئاهەنگ و خۆشی خۆیان دەرببڕن.

 

لێدوانی فەرمی: شێخ غەزال غەزالی، مەرجەعی باڵای عەلەوییەکانی سووریا لە پەیامێکی ڤیدیۆییدا باسی لەوەکرد، حکومەتی ڕاگوزەری سووریا دەیەوێت ئاهەنگ بۆ گۆڕینی "ستەمکار بۆ ستەمکارتر" بکات، بۆیەش بە هەڕەشەی نانبڕین و ترساندن دەیانەوێت خەڵک بەشداریی ئاهەنگی ساڵیادی کەوتنی ئەسەد بکەن، لەکاتێکدا دەبوایە کەوتنی ئەسەد کەوتنی ستەمکاری بێت، بەڵام کەوتنی "ئەوەش بوو کە لە نیشتیماندا مابوو و تا دێت فکری تاریک پەرستی، نادادپەروەریی و ناڕەزایی زیاتر دەبێت."

 

ئەوەشی خستووەتەڕوو، بۆیە داوا لە هەموو مرۆڤێکی ئازادیخواز دەکات لە 8 تا 12ی ئەم مانگە بەشداری مانگرتنی ئاشتییانە دژی ستەمکاری بکەن و لە ماڵەکانیاندا بمێننەوە، "هەر هێرشێک بۆ سەر یەک کەسیش هێرشە بۆسەر هەموومان".

 

ئەمەش بزانە: دوێنێش ئیدارەی ڕۆژئاوای کوردستان ڕایگەیاند، بەهۆی زیادبوونی مەترسییەکانی داعش و قۆستنەوەی گردبوونەوەی خەڵک بەبۆنەی ساڵیادی ڕووخانی دەسەڵاتی بەعس لە سووریا، ڕۆژانی 7  و 8ی ئەم مانگە هەموو جۆرە کۆبوونەوە، چالاکی جەماوەریی و کۆمەڵایەتییەکان و بەکارهێنانی چەک و یاری ئاگرینی لە هەموو ناوچەکانیان قەدەغەیە.