سوودانی: بەهۆی هەماهەنگی نێودەوڵەتییەوە دەستمان بەسەر شەش تۆن ماددەی هۆشبەردا گرتووە

ئاڤا نیوز

سەرۆکوەزیرانی عێراق دەڵێت، ماددە هۆشبەرەکان هەڕەشەن لەسەر ئاسایشی وڵاتان و دەبێت پێکەوەکارکردن بۆ نەهێشتنییان زیاتر بکەن، ئاشکراشی دەکات کە تەنیا بەهۆی هەماهەنگی نێودەوڵەتییەوە دەستیان بەسەر شەش تۆن ماددەی هۆشبەردا گرتووە.

ئەوەی پێویستە بیزانیت: ئەمڕۆ بەبەشداری 12 وڵات، سێیەمین کۆنگرەی نێودەوڵەتی بەغدا بۆ ڕووبەڕووبوونەوەی ماددە هۆشبەرەکان دەستیپێکرد و سبەی دووشەممەش کارەکانی کۆنگرەکە بەردەوام دەبێت.

لێدوانی فەرمی: محەممەد شیاع سوودانی، سەرۆکوەزیرانی عێراق لە کۆنگرەکەدا قسەی کرد و ئەوەی خستەڕوو، بەهۆی هەماهەنگی نێودەوڵەتییەوە توانیویانە دەستبەسەر شەش تۆن ماددەی هۆشبەردا بگرن، ئەویش لە ئەنجامی  11 یاداشتی لێکتێگەیشتن لەگەڵ وڵاتان، 345 پرۆسەی ئاڵوگۆڕی زانیاری و نزیکەی 1300 ئاگادارکردنەوەی یەکتری لەسەر بابەتی ماددەی هۆشبەرەکان.

وتیشی، حکومەتی عێراق هەڵمەتێکی بەهێزی بۆ ڕووبەڕووبوونەوەی بازرگانانی ماددەی هۆشبەر دەستپێکردووە، چونکە باوەڕی وایە بازرگان و داهاتی ماددە هۆشبەرەکان دەبنەهۆی نائارامی و ئەوەش هەڕەشەیە لەسەر ئاسایشی وڵاتان، بۆیەش دەبێت قۆناغ بە قۆناغ مەترسییەکان کەم بکەنەوە و نەیهێڵن.