پێشنیاز دەکرێت تەنیا شەش خواردن لە قوتابخانەکانی عێراق ڕێگەپێدراو بن

ئاڤا نیوز

وەزارەتی تەندروستیی عێراق لیستی خۆراکی تایبەتی بۆ پڕۆژەی خۆراکی قوتابخانەکان بۆ ئەمساڵی خوێندن ئامادەکردووە کە تایبەتن بە گەشەی دەروونی و جەستەیی قوتابییان.

لێدوانی فەرمی: د. ئەروا عەبدولخالق عەلی، بەڕێوەبەری پرۆگرامی تەندروستی قوتابخانە لە وەزارەتی تەندروستی ئاشکرای کردووە، وەزارەت چەندین کۆبوونەوەی بەرفراوانی سەبارەت بە پڕۆژەی پێشنیازکراوی خۆراکی قوتابخانە بۆ ساڵی خوێندنی ئێستا کردووە، هاوکات لیستی خۆراکی دیاریکراوی بۆ لایەنە پەیوەندیدارەکان پێشکەش کردووە.

د. ئەروا عەبدولخالق، ئاماژەی بەوەشکردووە، ڕێنمایی پابەندکەر بۆ دەستپێکردنی پڕۆژەکە دەخاتەڕوو، بەتایبەتی کە زۆربەی فرۆشگەی قوتابخانەکان خواردنی ناتەندروست پێشکەش دەکەن کە ڕێژەیەکی زۆر شەکر و چەوریی تێدایە، بۆ تەمەنی قوتابیان و گەشەکردنی بەردەوامی دەروونی و جەستەیییان ناگونجێن.

زانیاریی زیاتر: ئەو شەش خۆراکەی وەزارەتی تەندروستی پێشکەشی کردووە بریتین لە، میوە، شیر، نان، کێکی تەندروستی، هێلکەی کوڵاو و گەنمەشامی کوڵاوی تەندروست، بە وتەی ناوبراو ئەم لیستە پێشکەش بە لایەنە پەیوەندیدارەکان کراوە بۆ پێداچوونەوە و پەسەندکردنی.