فریاکەوتنی خێرای سلێمانی دەخرێتە "ئەوپەڕی ئامادەباشییەوە"

ئاڤا نیوز

بەهۆی بەردوامی بارانبارینەوە لافاو لە قەزای چەمچەماڵ دروستبووە و زیانی گیانی هەیە، فریاکەوتنی خێرای سلێمانیش دەخرێتە دۆخی ئەوپەڕی ئامادەباشییەوە. 

وێنە گەورەکە: ماوەی 24 کاتژمێرە شەپۆلێکی بارانبارین ڕووی لە هەرێمی کوردستان کردووە، بەهۆیەوە لافاو لە قەزای چەمچەماڵ دروستبووە و دوو هاووڵاتیش گیانیان لەدەستداوە و پێنجی دیکەش برینداربوون.

ڕاگەیێنراوی فەرمی: بەڕێوبەرایەتیی گشتیی تەندروستی سلێمانی ڕایگەیاند: سەرجەم تیمەكانی فریاكەوتنی خێرای تەندروستی خراونەتە دۆخی ئەوپەڕی ئامادەباشییەوە.

- هەر لە ڕاگەیێنراوەکەی تەندروستی سلێمانیدا هاتووە، بەهۆی ئەو شەپۆلە بارانبارینە بەخوڕەی ڕووی لە پارێزگای سلێمانی و دەوروبەری کردووە، مەترسی دروستبوونی لافاو و حاڵەتی نەخوازراو لە چەند شوێنێک لە ئارادایە، لەسەر فەرمانی بەڕێوەبەری گشتی تەندروستی سلێمانی، سەرجەم تیمەکانی ژمارە 122  خرانە دۆخی " ئەوپەڕی ئامادەباشییەوە" بۆ بەهاناوەچوونی هاووڵاتییان لە هەر دۆخێکی نەخوازراودا. 


- لەکاتی بوونی هەر ڕووداوێکی نەخوازراودا داوا لە هاووڵاتییان دەکەین، بەزووترین کات پەیوەندی بە تیمەکانمانەوە بکەن و بەهانایانەوە دەچین.