ڕێگای سلێمانی- چەمچەماڵ- کەرکووک پەکی کەوتووە

ئاڤا نیوز

 

پەیامنێری ئاڤا نیوز ئاشکرایکرد، بەهۆی ئەو لافاوەی لە چەمچەماڵ و گەرمیان دروست بووە، چەندین ڕێگای سەرەکی گیراون و بەتایبەتی ڕێگای سلێمانی- چەمچەماڵ- کەرکووک پەکی کەوتووە.

 

چیرۆکی سەرەکی: ژیوار عەبدولرەحمان، پەیامنێری ئاڤا نیوز لەسەر ڕێگای سلێمانی چەمچەماڵ ئاشکرایکرد، بەهۆی کۆبوونەوەی ئاو لەسەر شەقامەکان، ڕێگای سەرەکی سلێمانی – چەمچەماڵ – کەرکووک، چەندین ئۆتۆمبێل پەکیان کەوتووە و ڕێگاکە بەڕووی هاتووچۆی هاوڵاتیاندا پەکی کەوتووە.

 

زانیاری زیاتر: تیمە فریاگوزارییەکانی هاتووچۆی سلێمانی و پۆلیسی بەرگریی شارستانی سەرقاڵی پێشکەشکردنی هاوکارییە فریاگوزارییەکانن، بەڵام بەهۆی ئەوەی زیانەکان گەورەن هێشتا نەتوانراوە ڕێگاکە بکرێتەوە بۆ ئەوەی کارئاسانیی بکرێت بۆ هاتووچۆی ئۆتۆمبێلە فریاگوزارییەکان.

 

مەترسی زیاتر: کردنەوەی ڕێگا سەرەکییەکە کارێکی گرنگە، بەوپێیەی مەترسی ئەوە هەیە ئەمشەو شەپۆلێکی بەهێزتر دابکات و زیانی زۆرتر بگەیەنێت، بەتایبەتی بەو ئۆتۆمبێل و خەڵکانەی لە ناوچە جیاجیاکان گیریان خواردووە.

 

ڕاگەیێندراوی فەرمی: لە ڕاگەیێنراوەکەی تەندروستی سلێمانیدا هاتووە، بەهۆی ئەو شەپۆلە بارانبارینە بەخوڕەی ڕووی لە پارێزگای سلێمانی و دەوروبەری کردووە، مەترسی دروستبوونی لافاو و حاڵەتی نەخوازراو لە چەند شوێنێک لە ئارادایە، لەسەر فەرمانی بەڕێوەبەری گشتی تەندروستی سلێمانی، سەرجەم تیمەکانی ژمارە 122  خرانە دۆخی " ئەوپەڕی ئامادەباشییەوە" بۆ بەهاناوەچوونی هاووڵاتییان لە هەر دۆخێکی نەخوازراودا.