کوڕە ونبووەکەی چەمچەماڵ بە سەلامەتی گەڕایەوە

ئاڤا نیوز

ئەو کوڕەی لە سەرەتای لافاوەکەی چەمچەماڵ ونبووبوو و کەسوکاری لە ڕێگای ئاڤامیدیاوە داوای بەهاناوەچوون و سۆراغی کوڕەکەیان دەکرد، ئێوارەی ئەمڕۆ  بە سەلامەتی گەڕایەوە ماڵەوە.

 

چیرۆکی سەرەکی: ئەمڕۆ سێشەممە لە کاتی لافاوەکەی چەمچەماڵ، ئافرەتێک بەناوی سنەوبەر کەریم بە کوڵ دەگریا باسی لەوە کرد کوڕێکی خانەوادەکەیان بە ناوی میر قوباد ون بووە و لە ڕێگەی ئاڤا میدیاوە داوای بە هاناوەچوونی کرد.

 

چی ڕووی دا: ئێوارەی ئەمڕۆ میر قوباد لەگەڵ هاوڕێیەکی گەڕانەوە و هەردووکیان سەلامەت بوون، لەو بارەیەوە میر قوباد، بە ئاڤا میدیای گوت: کاتژمێر یەک دەوامم تەواو بوو، بەڵام لەو پاسەی قوتابیان دەگوازێتەوە سەرنەکەوتم و لەگەڵ هاوڕێیەکم ویستمان بە پیادە بگەڕێنەوە، پێمان وابوو بە پیادە زووتر دەگەینەوە، بەڵام بەهۆی لافاوەوە ڕێگەمان لێگیرا و نەمانتوانی بگەڕێینەوە.

 

گوتیشی، دواتر زۆربەی چەمچەماڵ گەڕاین، ڕێگەیەکمان نەدۆزیەوە بگەڕێینەوە، هەموو لافاو بوو، دواتر تاکسییەکمان گرت و گەڕاینەوە، کە هاتمەوە هەموویان بە گریانەوە پێشوزاییان لێکردین.

 

لە لایەکی دیکەوە: سنەوبەر کەریم، پوری میر قوباد، بە ئاڤا میدیای گوت: میر تا کاتژمێر چوار نەگەڕابووەوە، زۆر خەمبار و پەرێشان بووین، دواتر لەگەڵ برادەرێکی گەڕایەوە، بە بینینی زۆر دڵخۆش بووین، سوپاسی ئاڤا میدیا دەکەین دەنگی ئێمەیان گەیاند.

زانیاریی زیاتر: میر قوباد، خەڵکی چەمچەماڵە و پۆلی 12ـی زانستییە لە قوتابخانەی چەرموو.

 

باکگراوند: ئەمڕۆ سێشەممە 9-12-2025، لە سنووری قەزای چەمچەماڵ، بەهۆی زۆری ڕێژەی بارانبارین لە ماوەی کەمتر لە چوار کاتژمێر لافاو دروست بوو، لە ئەنجامدا دوو کەس لە سنووری ئەو قەزایە گیانیان لەدەستدا، ژمارەیەک کەسی دیکەش برینداربوون و لافاو زیانی زۆری بە سنوورەکە گەیاند.