هەشت فەرمانگەی حکومی بەهۆی لافاو لە چەمچەماڵ زیانیان بەرکەوتووە

ئاڤا نیوز

 

بەهۆی دروستبوونی لافاو لە قەزای چەمچەماڵ زیانی گیانی و ماددی بە ناوچەکە گەیاندووە، هەشت فەرمانگەی حکومیش کەوتوونەتە ژێر ئاو زیانیان بەرکەوتووە.

 

چیرۆکی سەرەکی: بەهۆی بارانبارینی زۆر لە قەزای چەمچەماڵ لافاو لە ناوچەکە دروست بوو زیانی گیانی و ماددی زۆری لێکەوتەوە. ژمارەی ئەو فەرمانگانەی بەهۆی لافاو زیانیان بەرکەوتووە نزیکەی هەشت فەرمانگەیە و ئاو چووەتە ناو بینایەکانیان و زیانیان بەرکەوتووە.

 

لێدوانی فەرمی: هێرش عەبدوڵرەحمان محەممەد، بەڕێوەبەری کتێبخانەی گشتیی چەمچەماڵ، بە ئاڤا میدیای ڕاگەیاند، بەهۆی لافاوەکەی چەمچەماڵ ئاو هاتووەتە ناو کتێبخانەکەمان و زیانی زۆری پێگەیاندووین کە نزیکەی 60%ـی کتێبەکانمان کەوتۆتە ژێر ئاو.

 

ئەو فەرمانگانەی کە لە چەمچەماڵ زیانیان بەرکەوتووە هەشت فەرمانگەن و ئەمانەن: بینای فەرمانگەی پێوانەی کەشوهەوای چەمچەماڵ، کتێبخانەی گشتیی، هۆڵی ڕۆشبنیری، فەرمانگەی کشتووکاڵ، فەرمانگەی جەوازات، قایمقامیەت و پۆلیس و بەشی خۆراک هەر لەناو قایمقامیەتی چەمچەماڵە ئاو چووەتە ناویانن و زیانیان بەرکەوتووە.

 

زانیاریی زیاتر: هێرش عەبدوڵرەحمان دەڵێت، کتێبخانەکەمان هەموو کەلوپەلەکانمان کەوتۆتە ژێر ئاو و کەڵکی نەماوە، ئەو فەرمانگانەی دیکەش زیانیان بەرکەوتووە بەڵام تائێستا زیانەکان مەزندە نەکراوە چەندە.

 

لەلایەکی دیکەوە: دیلان ڕەشاد، گوتەبێژی وەزارەتی گواستنەوە و گەیاندن، بە ئاڤا میدیای گوت: بەهۆی چوونەوە ناوەوەی ئاوی باران و ژێرئاوکەوتنی ئامێرەکانی فەرمانگەی پیوانەی کەشوهەوا لە چەمچەماڵ، هەموو ئامێرەکان تێکچوون و فەرمانگەکە پەکی کەوتووە، بەهۆی تێکچوونی ئامێرەکان نەتوانراوە پێوانەکانی کەشوهەوا لە 24 کاتژمێری ڕابردوو تۆمار بکرێت و نازانرێت ڕێژەی بارانی بارینی سنووری چەمچەماڵ چەندە.

 

ڕەمک ڕەمەزان، قایمقامی چەمچەماڵ بە ئاڤای گوت، لە چەمچەماڵ زیاتر لە 500 ماڵ زیانیان بەرکەوتووە، جگە لەوەی زیان بە چەندین فەرمانگەی حکومی، بازاڕ و دوکان، ئۆتۆمبێل و کەلوپەل کەوتووە، ئەو هاونیشتمانییانەی شۆفڵ و ئامێریان هەبووە هاوکاریی تیمەکانی حکومەتیان کرد، ئەگەرنا قوربانییەکان زیاتر دەبوون.

 

باکگراوند: دوێنێ سێشەممە لە چەمچەماڵ دوو کەس بەهۆی لافاو گیانیان لەدەست دا و منداڵێکی تەمەن 9 ساڵانیش لە کەرکووک خنکا، ئەمڕۆش منداڵێکی تەمەن 10 بۆ 12 ساڵان کەوتە ناو چەمی گازینۆ لە کەلار لە سنووری ئیدارەی گەرمیان و تا ئێستاش تەرمەکەی نەدۆزراوەتەوە.