شارەزایەکی کەشناسی: هەوری سوپەر سێڵ بەڕێوەیە و تا 50 ملیمەتر بارانی لەگەڵدایە

ئاڤا نیوز

شارەزایەکی کەشناسی هۆشداریی بە هاووڵاتیان دەدات کە هەورێکی سوپەر سێڵ لە گەرمیان دروست بووە و بەرەو سلێمانی و ئێران دەڕوات و بڕێکی زۆری بارانی هەڵگرتووە.

وێنە گەورەکە:  لەماوەی ئەم هەفتەیە دوو شەپۆلی بارانبارین ڕوویان لە هەرێمی کوردستان کردووە، بە هۆیەوە بەشێک لە ناوچەکان ئاستی ئاویان بەرزبووەتەوە.

لێدوانی فەرمی: لوقمان حەوێزی، شارەزای کەشناسی ڕایگەیاند، لە کەلار هەوری سوپەر سێڵ دروست بووە و بەرەو سلێمانی و سنووری ئێران دەڕوات. 

ئەو کەشناسە دەڵێت، هەورەکە چەند كاتژمێرێكی دەوێت تا تێپەڕدەبێت، هەروەها 30 بۆ 50 میلیمەتر بارانی پێیە.

زانیاریی زیاتر: هەورەکە بەسەر ناوچەکانی ڕۆژهەڵاتی سلێمانی و پێنجوێن و هەڵەبجە تێدەپەڕێت تا دەگاتە سنوورەکانی ئێران.

لەلایەکی دیکەوە: بەڕێوەبەرایەتیی گشتیی کەشناسی و بومەلەرزەزانی بڵاویکردووەتەوە، سبەی چوارشەممە لە ئەنجامی بەردەوامی کاریگەری شەپۆلی بارانبارین ئاسمان هەوری تەواو دەبێت و هەندێک کات نیمچە هەور دەبێت. لە سنووری پارێزگای هەولێر و دهۆک هەندێک کات نمە بارانی پچڕ پچڕ دەبارێت و لە ناوچە شاخاوییەکان بارانی مامناوەند دەبارێت، هەروەها لە سەر ناوچە شاخاوییە سنوورییەکان ئەگەری بەفر بارین هەیە.