بەهۆی کێشە لە سیستەمی ئەلیکترۆنیی خۆراکدا پارەی دوو هەزار کەس لە دهۆک فەوتاوە

ئاڤا نیوز

بەهۆی کێشەیەکی تەکنیکی لە سیستەمی پسوولەی خۆراکی ئەلیکترۆنی، نزیکەی دوو هەزار هاووڵاتی لە دهۆک پارەیان لێ وەرگیراوە و کارەکانیان بۆ جێبەجێ نەکراوە.

لێدوانی فەرمی: سیامەند قادر، بەڕێوەبەری پسوولەی خۆراکی هەولێر، بە ئاڤای ڕاگەیاند: کێشەیەکی تەکنیکی لە نێوان سیستەمی پسوولەی خۆراکی ئەلیکترۆنی و سیستەمی پارەدانی ئەلیکترۆنی دروست بووە، بەو هۆیەوە وەزارەتی بازرگانیی عێراق بە شێوەیەکی کاتی خزمەتگوزارییەکانی ڕاگرتووە. ئەم بڕیارە بۆ پاراستنی دارایی هاووڵاتییان و ڕێگریکردن لە بەفیڕۆچوونی پارەکانیان دراوە، تاوەکو تیمە تەکنیکییەکان کێشەکە چارەسەر دەکەن.

٠ بەڕێوەبەری پسوولەی خۆراکی هەولێر ئاماژەی بەوەش کرد، تەنیا لە سنووری پارێزگای دهۆک نزیکەی دوو هەزار هاووڵاتی زیانیان بەرکەوتووە.

زانیاریی زیاتر: لە ناوچەکانی دیکەی کوردستانیش هاووڵاتییان پارەیان فەوتاوە، بەڵام ڕێژە زۆرەکە لە دهۆکە؛ چونکە خزمەتگوزاریی زیادکردنی منداڵ لە دهۆک کارایە. ئەم هاووڵاتییانە ویستوویانە منداڵەکانیان بۆ سەر پسوولەی خۆراک زیاد بکەن و بڕی شەش هەزار دینار لە هەژمارەکانیان بڕدراوە، بەڵام بەهۆی کێشەی سیستەمەکەوە کارەکانیان بۆ جێبەجێ نەکراوە.

لەلایەکی دیکەوە: سەبارەت بە گەڕانەوەی ئەو بڕە پارەیەی لە هاووڵاتییان بڕدراوە، بەڕێوەبەری پسوولەی خۆراکی هەولێر دەڵێت: بۆ وەرگرتنەوەی پارەکە، دەبێت هاووڵاتی سەردانی ئەو بانکە بکات کە کارتەکەی لێ دەرهێناوە. بۆ نموونە ئەگەر کەسێک لە ئاکرێ یان دهۆک بێت و بانکەکەی لە هەولێر بێت، تێچووی هاتوچۆکەی چەند هێندەی ئەو شەش هەزار دینارەیە کە لێی بڕدراوە، بۆیە ئەمە کارێکی ئەستەمە.

٠ سیامەند قادر جەختی لەوەش کردەوە کە پێویستە وەزارەتی بازرگانیی عێراق چارەسەرێکی ڕیشەیی بۆ ئەم کێشە تەکنیکییانە بدۆزێتەوە، چونکە ئەمە چەندین جارە دووبارە دەبێتەوە و دەبێتە هۆی نیگەرانیی هاووڵاتییان.