پێشنیازی پێکهێنانی لیژنەیەکی پەرلەمانیی تایبەت بە بەرەنگاربوونەوەی ماددە هۆشبەرەکان دەکرێت

ئاڤا نیوز

بەهۆی بڵاوبوونەوەی بەرفراوان و زۆربوونی بەکارهێنەرانی ماددە هۆشبەرەکان، پەرلەمانتارانی عێراق پێشنیازی دامەزراندنی لیژنەیەکی هەمیشەییی پەرلەمان دەکەن کە تایبەت بێت بە بەرەنگاربوونەوەی ماددە هۆشبەرەکان.

لێدوانی فەرمی: حوسێن دەراجی، ئەندامی پەرلەمانی عێراق ڕایگەیاندووە، بەفەرمی لەگەڵ چەندین پەرلەمانتاری دیکە پێشنیازێکیان پێشکەشی سەرۆکایەتیی پەرلەمان کردووە بۆ دامەزراندنی لیژنەیەکی تایبەت و هەمیشەییی بەرەنگاربوونەوەی ماددە هۆشبەرەکان.

٠ ئەو پەرلەمانتارانە بە پشتبەستن بە ماددەی 174ـی پەیڕەوی ناوخۆی پەرلەمانی عێراق ئەو پێشنیازەیان کردووە، کە ڕێگە بە هەموارکردنەوەی پەیڕەوی ناوخۆ دەدات بە ڕەزامەندیی زۆرینەی پەرلەمانتاران؛ بۆیە ناوبراو پێشنیازی کردووە پەیڕەوی ناوخۆ هەموار بکرێتەوە و ئەو لیژنەیە لەپاڵ 25 لیژنەکەی دیکەی پەرلەماندا زیاد بکرێت.

زانیاریی زیاتر: پرسی ماددە هۆشبەر و کارتێکەرە دەروونییەکان تایبەتە بە لیژنەی تەندروستی و ژینگەییی پەرلەمانی عێراق، بەڵام بەهۆی زیادبوونی بەکارهێنەرانی ئەو ماددانە، پێشنیاز کراوە لیژنەیەکی تایبەتی هەمیشەیی لە پەرلەمان بۆ ئەو مەبەستە تەرخان بکرێت.