ڕۆیتەرز: تاران لە هێرشی ئەمریکا و ڕاپەڕینی ناوخۆیی دەترسێت

ئاڤا نیوز

دەسەڵاتدارانی ئێران نیگەرانن لەوەی هەر هێرشێکی سەربازیی ئەمریکا ببێتە بزوێنەری ڕاپەڕینێکی جەماوەری و کۆتاییهێنان بە سیستەمی سیاسیی وڵاتەکە.

لێدوانی فەرمی: بەرپرسێکی ئێرانی بە ئاژانسی ڕۆیتەرزی ڕاگەیاندووە: هێرشی دەرەکی لەگەڵ خۆپیشاندانی خەڵک، دەتوانێت سیستەمەکە بڕوخێنێت، ئەوەیش گەورەترین نیگەرانییە لە لای بەرپرسانی باڵا." هەروەها بەرپرسێکی پێشووی باڵی ڕیفۆرمخوازان دەڵێت: "خەڵک بە شێوەیەکی بێوێنە تووڕەن. دیوارەکانی ترس ڕووخاون و چیتر ترس بوونی نەماوە.

زانیاریی زیاتر: ئاژانسی ڕۆیتەرز، لە زاری شەش بەرپرسی ئێستا و پێشووی کۆماری ئیسلامی ئێرانەوە بڵاویکردەوە، کە دەسەڵاتدارانی تاران لەوە دەترسن هەر هێرشێکی سەربازیی ئەمریکا ببێتە بزوێنەرێک بۆ ڕاپەڕینی خەڵک و کۆتاییهێنان بە دەسەڵاتیان.

ئەوەی پێویستە بیزانیت: ڕاپۆرتەکە ئاماژە بەوە دەکات کە بەرپرسانی باڵای ئێران بە عەلی خامنەیی، ڕێبەری باڵای ئێرانیان ڕاگەیاندووە، توڕەیی خەڵک گەیشتووەتە لوتکە و چیدیکە ترس ڕێگر نابێت لە بەردەم خۆپیشاندەران. بەرپرسانی ئێران هۆشدارییان داوە کە ئەگەر ئەمریکا هێرشێکی سنوورداریش بکات، ئەوا خەڵک دەڕژێنەوە سەر شەقامەکان و گورزێکی کوشندە لە دەسەڵات دەدەن.

ئەمەش بزانە: زانیارییەکان ئاماژە بەوە دەدەن کە دۆناڵد ترەمپ بژاردەی "هێرشی دیاریکراو" بۆ سەر هێزە ئەمنییەکان و سەرکردەکان تاوتوێ دەکات، بە ئامانجی ئەوەی هانی خۆپیشاندەران بدات بۆ ڕووخاندنی ڕژێم. ئەمە لە کاتێکدایە کە هەڵوێستی فەرمی و گشتی تاران بەرامبەر ئەمریکا بە "توند و سەرکێش" دەردەکەوێت، بەڵام لە کۆبوونەوە نێوخۆییەکاندا نیگەرانییەکی قووڵ لەسەر داهاتووی دەسەڵات هەیە.