وەزیری ئابووریی لوبنان: ژوورێکی بازرگانی لەگەڵ حکوومەتی هەرێمی کوردستان دروست دەکەین

ئاڤا نیوز

لە کۆڕبەندی لووتکەی حکومەتەکان لە دوبەی، عامر بەسات، وەزیری ئابووری و بازرگانیی لوبنان، بۆ ئاڤا میدیا ئاشکرای کرد کە سەردانی هەرێمی کوردستان دەکات و ژوورێکی هاوبەشی بازرگانی لەگەڵ ژووری بازرگانیی حکومەتی هەرێمی کوردستان دروست دەکەن، بۆ برەودان بە پەیوەندییە بازرگانییەکان.

لێدوانی فەرمی: عامر بەسات لە لووتکەی جیهانیی حکوومەتەکان لە دوبەی، لە لێدوانێکی ڕۆژنامەوانیی تایبەتدا بۆ ئاڤا میدیا ڕایگەیاند؛ لە لێکۆڵینەوە و کارەکانیاندا زۆر سەرنجیان لەسەر عێراق و هەرێمی کوردستانە، هەروەها وەبەرهێنەری زۆریان لە بوارەکانی پیشەسازی و گەشتیاری لە عێراق و هەرێمی کوردستاندا هەن.

زانیاریی زیاتر: وەزیری ئابووریی لوبنان ئاماژەی بەوە کرد کە لوبنان زۆر بە ئەرێنی سەیری بازاڕی وەبەرهێنانی کوردستان دەکات؛ زۆر لە بازرگانانی لوبنانی لە بوارەکانی پیشەسازی، گەشتیاری و بوارەکانی دیکە لە کوردستاندا هەن و گرنگیی زۆر بە هەرێمی کوردستان دەدەن.