کەشناسی چەمچەماڵ بەهۆی لافاوەکەوە لەکار کەوتووە

ئاڤا نیوز

 

فەرمانگەی پێوانەی کەشوهەوا لە چەمچەماڵ، یەکێکی دیکەیە لەو فەرمانگە حکومییانەی کە بەهۆی لافاوەکەی چەمچەماڵ زیانی پێگەیشتووە و زۆرینەی ئامێر و کەلوپەلەکانی ژێر ئاو کەوتووە و کارەکان لەو فەرمانگەیە وەستاون.

 

چیرۆکی سەرەکی: ئەمڕۆ سیشەممە 9-12-2025، بەهۆی زۆری ڕێژەی باران بارین، لە سنووری قەزای چەمچەماڵ و ئیدارەی سەربەخۆی گەرمیان، زیانی گیانی و ماددی زۆری لێکەوتەوە.

 

لێدوانی فەرمی: دیلان ڕەشاد، گوتەبێژی وەزارەتی گواستنەوە و گەیاندن، زانیارییەکانی بۆ ئاڤا پشتڕاستکردەوە و بە ئاڤا میدیای گوت: بەهۆی چوونەوە ناوەوەی ئاوی باران و ژێرئاوکەوتنی ئامێرەکانی فەرمانگەی پیوانەی کەشوهەوا لە چەمچەماڵ، هەموو ئامێرەکان تێکچوون و فەرمانگەکە پەکی کەوتووە.

 

کاریگەری و لێکەوتەکان: بەهۆی تێکچوونی ئامێرەکان نەتوانراوە پێوانەکانی کەشوهەوا لە 24 کاتژمێری ڕابردوو لەو ناوچەیە تۆمار بکرێت و نازانرێت ڕێژەی بارانی بارینی سنووری چەمچەماڵ چەند بووە.

 

چارەسەرەکان: بە گوتەی دیلان ڕەشاد، ئێستا کار لەسەر ئەوە دەکرێت لە یەکێک لە فەرمانگەکانی دیکەی پێوانەی کەشوهەوا لە شار و ناوجەکانی دیکە بۆ چەمچەماڵ بگوازرێتەوە.

 

زیانی فەرمانگە حکومییەکان: هەشت فەرمانگە بەهۆی لافاوەکەوە زیانیان بەرکەوتووە کە ئەمانەن: بینای فەرمانگەی پێوانەی کەشوهەوای چەمچەماڵ، کتێبخانەی گشتیی، هۆڵی ڕۆشبنیری، فەرمانگەی کشتووکاڵ، فەرمانگەی جەوازات، قایمقامیەت، پۆلیس و بەشی خۆراک هەر لەناو قایمقامیەتی چەمچەماڵە ئاو چووەتە ناویان و زیانیان بەرکەوتووە.