چوار بەنداوی سنووری گەرمیان سەرڕێژ بوون

ئاڤا نیوز

 

لە کۆی پێنج بەنداوی سنووری گەرمیان، چواریان سەرڕێژ بوون، بەنداوەکەی دیکەش بەهۆی ئەوەی تاوەکو ئێستا کاری تێدا دەکرێت و ئاوەکەی بە بەردەوامی لەبەری دەڕوات، بۆیە سەرڕێژ نەبووە.

 

وێنە گەورەکە: ماوەی چەند ڕۆژێکە شەپۆلێکی بارانبارین هەرێمی کوردستانی گرتووەتەوە، بە هۆیەوە ئاوی سەرجەم بەنداوەکان زیادی کردووە، لە سنووری گەرمیانیش بەهۆی ئەو بارانە زۆرە، تا ئێستا چوار بەنداو سەرڕێژ بوون.

 

لێدوانی فەرمی: ئەندازیار جەبار مەحموود قادر، بەرێوبەری بەنداوەکانی گەرمیان بە ئاڤا میدیای ڕاگەیاند: لە سنووری ئیدارەی گەرمیان پێنج بەنداو هەن، لە دوێنێ شەوەوە تاوەکو ئێستا چوار بەنداویان سەرڕێژ بوون.

بەنداوی کفری (باوە شاسوار): قەبارەی حەوزەکەی شەش ملیۆن مەتر سێجا ئاو دەگرێت، لە کاتژمێر 5:00ی بەیانیی ئەمڕۆ چوارشەممە سەرڕێژی کرد، ئاوەکەی بە بەرزیی 120 سانتیمەتر بۆ 140 سانتیمەتر لەبەری دەڕوات.

بەنداوی ئاوە سپی: شەوی ڕابردوو بە بەرزیی سێ مەتر سەرڕێژی کرد، قەبارەی حەوزەکەی 21 ملیۆن و 250 هەزار مەتر سێجا ئاو دەگرێت.

بەنداوی تورەجاڕ: ئەو بەنداوە دەکەوێتە سنووری ناحیەی شێخ تەویل، قەبارەی حەوزەکەی دوو ملیۆن مەتر سێجا ئاو دەگرێت، ئەویش دوێنێ شەو بە بەرزی سێ مەتر سەرڕێژی کرد.

بەنداوی حەسەن کەڕنووش: ئەو بەنداوەش یەکێکە لە بەنداوە گرنگەکانی سنووری ئیدارەی گەرمیان، ئەویش بە بەرزیی 80 سانتیمەتر سەرڕێژی کرد.

بەنداوی خۆرنەوازان: هێشتا کاری تێدا دەکرێت، ئێستا 96٪ی کارەکانی تەواو بووە، ئەو بەنداوەش سەرڕێژ بوو، بەڵام لەبەرئەوەی هێشتا کاری تێدا دەکرێت و بە بەردەوامی ئاوی پێدا دەڕوات، بە سەرڕێژبوون هەژمار ناکرێت، ئەم بەنداوە لە ساڵی 2026 تەواو دەبێت.

 

زانیاریی زیاتر: بەرێوبەری بەنداوەکانی گەرمیان ئاشکرای دەکات، پار ساڵیش لە سنووری گەرمیان بارانی زۆر هات و بەنداوەکانی سنوورەکە بەرگەیان گرت و هیچ کێشەیەکان نەبوو.