لە دوو پارێزگای عێراق بەهۆی بارانەوە سبەی کرایە پشووی فەرمی

ئاڤا نیوز

هەریەک لە ئەنجوومەنی پارێزگای بابل و دیوانییە، بەهۆی باران و مەترسیی دروستبوونی لافاو، سبەی پێنجشەممەیان کردە پشووی فەرمی لە سەرجەم فەرمانگەکان، جگە لە دەزگا ئەمنییەکان و خزمەتگوزارییەکان.

 

وێنە گەورەکە: ئەم بڕیارە لە کاتێکدایە شەپۆلێکی بەهێزی بارانبارین لە 24 کاتژمێری ڕابردوودا عێراق و ناوچەکەی گرتووەتەوە، ئەمەش بووەتە هۆی دروستبوونی ئاستەنگی بۆ هاتووچۆ و مەترسیی لەسەر ژیانی هاووڵاتیان بەهۆی دروستبوونی لافاو لە چەند پارێزگایەکی جیاجیای عێراق و هەرێمی کوردستان.

 

ڕاگەیێنراوی فەرمی: بەگوێرەی ڕاگەیێنراوی ئەنجوومەنی پارێزگای بابل "بەهۆی بارینی بڕێکی زۆر باران و بۆ ڕەخساندنی دەرفەت بۆ دەزگا خزمەتگوزارییەکان بۆ ئەنجامدانی ئەرکەکانیان، ئەنجوومەنی پارێزگای بابل بڕیاری دا پشووی فەرمی سبەی پێنجشەممە، 11ی کانوونی یەکەم، بۆ سەرجەم فەرمانگەکان جگە لە ئەمنییەکان و خزمەتگوزارییەکان ڕابگەیەنێت."

 

لەلایەکی دیکەوە: پارێزگای دیوانییە لە ڕاگەیێنراوێکدا ڕایگەیاند: "بڕیاردرا سبەینێ پێنجشەممە لە سەرجەم فەرمانگە و دامەزراوەکانی دەوڵەت لە پارێزگاکەدا دەوامی فەرمی ڕابگیرێت."