ئاڤا ماڵی زیان لێکەوتوویەکی لافاوەکەی شۆڕش نۆژەن دەکاتەوە

ئاڤا نیوز

لە ناحیەی شۆڕش ژن و مێردێکی کەمدەرامەت بەهۆی لافاوەوە ماڵەکەیان وێران بووە و لەپەخشی ڕاستەوخۆی ئاڤا داوای هاوکاری و بەهاناوەچوون دەکەن، ئاڤاش بڕیاری نۆژەنکردنەوەی خانووەکەیانی دا.

چیرۆکی سەرەکی: ژن و مێردێکی هەژاری دانیشتووی ناحیەی شۆڕش لە چەمچەماڵ، ماوەیەکە پڕۆسەی هاوسەرگیرییان پێکێهێناوە و لە خانووی کرێدان بەهۆی لافاوەکەی دوو ڕۆژی ڕابردوو ئاو چووەتە ماڵەکەیان و هیچ شتێکیان بۆ دەرنەچووە و داوایان  لە ئاڤا کرد هاوکارییان بکات.

ئەو گەنجە لەگەڵ هاوژینەکەی گوزەرانییان لەسەر کۆکردنەوەی ماددە پلاستکییەکانە، گەنجەکە هەر بە فرۆشتنی دەبە و پلاستیک پارەی هاوسەرگیرییەکەی کۆکردبووەوە و ئەو ماڵە خنجیلانەی پێکهێنابوو.

لێدوانی فەرمی: گەنجەکە بە ئاڤای وت، کەس دەنگی ئێمە ناگەیەنێت داوا لە ئاڤا دەکەم هاوکاریمان بکات، دوای لێدوانەکە دەستبەجێ ئیدارەی ئاڤا میدیا بڕیاریدا ماڵەکەیان بۆ نۆژەن بکاتەوە و کرێ خانووەکەشیان بۆ بدات.

لەلایەکی دیکەوە: خوشکی ژنەکە بۆ ئاڤا وتی، لەوەتەی ماڵەکەیان بە لافاو وێران بووە سەد کەناڵ و پەیج هاتووە بۆ لایان و وەعدیان پێداون کەچی تا ئیستا کەس نەهاتووە و ماڵەکەشیان پاک بکاتەوە وەک لە وێنەکان دەبینن چی لەماڵەکەیان هاتووە و بەکەڵکی ژیان نەماوە.

باکگراوند: یەکێک لەو شوێنانەی بەهۆی لافاوەکەی دوو ڕۆژی ڕابردوو زیانی زۆری بەرکەوت ناحیەی شۆڕشی سەر بە قەزای چەمچەماڵ بوو، لە ماوەیەکی کەم ئاو و  قوڕ و لیتە چووە ناو دەیان ماڵ، هەر لە دەستپێکی ڕووداوەکە ئاڤا میدیا پیشەییانە ڕووماڵی ڕووداوەکەی کردووە لە خەمی خەڵکدا بووە.