ئاڤا میدیا بەهاوکاریی خێرخوازان گەرمی دەگەڕێنێتەوە ماڵی زیانلێکەوتووانی چەمچەماڵ و دەورووبەری

ئاڤا نیوز

ئاڤا میدیا بە هاوکاریی خێرخوازان لەم کەشە ساردە دا، گەرمی و ڕووناکی جارێکی دیکە دەگێڕێتەوە بۆ ماڵی سەدان زیانلێکەوتوو چەمچەماڵ و تەکیە و شۆڕش.

وێنە گەورەکە: لەماوەی 48 کاتژمێری ڕابردوودا ئاڤا میدیا لە ڕێگەی ناردنی هاوکاری بۆ لێقەوماوان، توانی سەدان ماڵی لە بێ ئومێدی دەربهێنێ و ڕووناکی بۆ ماڵەکانیان بگێڕێتەوە.

زانیاریی زیاتر: لەماوەی هەڵمەتی کۆکردنەوەی هاوکاری بۆ زیانلێکەوتووان، سەدان تۆن خۆراک و کەلوپەلی ناو ماڵ کۆکرانەوە، زیاتر لە یەک ملیار دینار لەڕێگای خێرخوازانەوە بەخشراوە.

ئەوەی پێویستە بیزانیت: ڕۆژی ڕابردوو دوو بارهەڵگری گەورە کە زیاتر لە 10 تۆن پێداویستی هەڵگرتبوو دابەشکران. تا درەنگانی شەویش بەڕێخستنی بارهەڵگرەکان لە ئۆفیسی سەرەکی هەولێر بەردەوامی هەبوو. 

- جگە لە هەولێر لە ئاکرێ و زاخۆ و دهۆکیش بەهەمان شێوە ئاڤا میدیا هەڵمەتی کۆکردنەوەی هاوکاری دەستپێکرد و ئۆفیسەکانمان پڕبوون لە پێداویستی. 

پەیوەست بەم بابەتەوە: چەند ڕۆژێکە تۆڕی پەیامنێرانی ئاڤا لە کوچە و کۆڵانەکانی چەمچەماڵ و تەکیە و شۆڕش ماندوونەناسانە بەدرێژایی ڕۆژەکە ڕووماڵی ئازار و مەینەتی خەڵکیان کرد.