ئەنجوومەنی باڵای فەتوا بڕیاری لەسەر فرۆشتنی کاڵاکانی ئەمازۆن لە تۆڕە کۆمەڵایەتییەکان دا

ئاڤا نیوز

 

یەکێتیی زانایانی کوردستان لەبارەی شەرعی بوون یان نەبوونی فرۆشتنی کەلوپەلی ئەمازۆن لەڕێگەی تۆڕە کۆمەڵایەتییەکان فەتوای دا و دەڵێت، ئەگەر کەلوپەلەکان زانراو بن و ئاشکرا بن لەبەرچاوی فرۆشیار ئەوە دروستە، بەپێچەوانەشەوە دروست نییە و حەرامە.

 

وێنە گەورەکە: فرۆشتنی کەلوپەلی گەڕاوەی ئەمازۆن لە جۆره‌كانی، ئه‌لیكترۆنی، میكس، پۆسته‌ی گه‌ڕاوەی (DHL‌) لە تۆڕە کۆمەڵایەتییەکان و لایڤی تیکتۆک بەشێوەی کۆ بووەتە دیاردە؛ بازرگانان و هاووڵاتیان پرسیاریان ئاراستەی ئەنجوومەنی باڵای فەتوای کوردستان کردووە سەبارەت بە دروستی و ناردروستی مامەڵەکە لە چوارچێوەی شەریعەتی ئیسلام.

 

لێدوانی فەرمی: عەبدوڵڵا شێرکاوەیی، وتەبێژی یەکێتیی زانایانی کوردستان بە ئاڤا میدیای ڕاگەیاند، ئەنجوومەنی باڵای فەتوا بڕیاری داوە ئەگەر کەلوپەلەکان زانراوبن و ئاشکرا بن لەبەرچاوی فرۆشیار ئەوە دروستە، بەڵام ئەگەر بازرگانان یان کەسانێک ئەم کارتۆنە کەلوپەلە بە ناڕوونی بفرۆشن بێ ئەوەی بزانرێت چی تێدایە و نرخی کەرەستەکان چەندە، بەبێ کردنەوەی کارتۆنەکە بفرۆشرێت، ئەوە دروست نییە و حەرامە.

 

لەلایەکی دیکە:  عەبدوڵڵا شێرکاوەیی دەشڵێت، ئەگەر کڕیار و فرۆشیار لەسەر ئەوە ڕەزامەندیش بن کارتۆنەکە نەکرێتەوە و مامەڵەی پێوە بکەن، دروست نییە لەبەر ئەوەی دەبێت مامەڵەکردن لە ڕووی شەرعەوە دیار و ڕوون بێت و کەلوپەلەکە لەبەرچاو بێت، پێغەمبەری ئیسلام (د.خ) قەدەغەی کردووە مامەڵەی نادیار بکرێت.