ئاڤا خێزانی پێشمەرگەیەکی پیرەمەگروون لە کرێچێتیی ڕزگار دەکات

ئاڤا نیوز

 

ڕۆژی سێشەممە، گەنجێکی پێشمەرگەی ناحیەی پیرەمەگروون لە پەخشی ڕاستەوخۆی ئاڤا گریا، لەبەرئەوەی لافاو زیانی پێگەیاندووە و خاوەن ماڵەکەی پێی وتووە چۆڵی بکە، بەڵام دوای کەمتر لە 24 کاتژمێر ئاڤا سوپرایزی بۆ کرد لە کرێچیەتیی رزگاری کرد.

 

چیرۆکی سەرەکی: ئەو پێشمەرگەیە ناوی رێکەوت-ە، خەڵکی ناحیەی پیرەمەگروونە، خاوەنی چوار منداڵە و خێزانەکەی شەش سەرخێزانن، لە خانوویەکی بچووک ژیان دەکات، بەڵام بەهۆی هەژاریی و کەمدەرامەتییەوە ناتوانێت کرێی خانووەکەی دابین بکات، خاوەنی خانووەکەش داوای لێ دەکات چۆڵی بکات.

 

زانیاریی زیاتر: خەڵکی زیان لێکەوتووی پیرەمەگروون، بانگێشتی کەناڵی ئاڤا میدیایان کرد بۆئەوەی خەڵکی کوردستان ئاگادار بکەنەوە لە زیانی لافاوەکە و کە ئەوانیش زیانی زۆریان پێگەیشتووە، چونکە هیچ لایەنێکی بەرپرس لێی نەپرسیبوونەوە و کۆمەکی نەکردبوون، هەر بۆیە ژوان قەرەداغی، پێشکەشکاری بەرنامەی مۆری ئاڤا سەردانی کردن و لە نزیکەوە سکاڵا و داخوازییەکانی گەیاندن و چەندین چیرۆکی پێشتر نەبیستراو ئاشکرابوون.

 

لایەنێکی دیکەی چیرۆکەکە: لە پەخشی ڕاستەوخۆی ئاڤا، پێشمەرگەیەک هاتە بەردەم مایکی ژوان قەرەداغی و وتی: "کرێچیم و وەزعم زۆر خراپە، ناتوانم کرێی خانووەکەم بدەم، بەم سەرمایە خاوەنی خانووەکە داوام لێدەکات چۆڵی بکەم، من مووچەکەم بەشم ناکات 700 هەزار وەردەگرم و لە نێوان هەولێر و سلێمانی هاتووچۆ دەکەم".

 

چارەسەر: ئاڤا میدیا بەرلەوەی 24 کاتژمێری بەسەردا تێپەڕێت و لە ڕۆژی چوارشەممە، بانگهێشتی ئەو پێشمەرگەیەی کرد، ڕاستەوخۆش مژدەی خانوویەکی نوێی پێدرا و فرمێسکی خەم و مەینەتی ئەو پێشمەرگەی پیرەمەگروونیان بۆ فرمێسکی پڕ ئومێدی و شادی گۆڕی و دۆخی ژیانی خێزانەکە بەتەواوی جێگیر بوو.