ئاک پارتی ڕاپۆرتی پەیوەندیدار بە پرۆسەی ئاشتیی پێشکەش  بە ئەردۆغان کرد

ئاڤا نیوز

ئاک پارتی ڕاپۆرتی پەیوەندیدار بە پرۆسەی ئاشتی ئامادە کردووە و پێشکەشی ڕەجەب تەیب ئەردۆغان، سەرۆککۆماری تورکیا و سەرۆکی گشتیی ئاک پارتی کردووە. بڕیارە سبەی ڕاپۆرتەکە ڕەوانەی سەرۆکایەتیی پەرلەمانی تورکیا بکرێت.

بۆچی گرنگە: پێشکەشکردنی ڕاپۆرتەکەی ئاک پارتی، دەرگا بە ڕووی قۆناغێکی نوێی پرۆسەکەدا دەکاتەوە. سەرجەم پارتەکانی دیکەی ناو کۆمیسیۆنە پەرلەمانییەکە، ڕاپۆرتی خۆیان پێشکەشی سەرۆکایەتیی پەرلەمان کردووە.

وردەکاریی ڕاپۆرتەکە: بەپێی زانیارییەکان، ڕاپۆرتەکەی ئاک پارتی لە نزیکەی 15 بەش پێکدێت و 50-55 لاپەڕە دەبێت. ئەم ڕاپۆرتە دید و تێڕوانینی ئاک پارتی بۆ چارەسەری کێشەکە لەخۆدەگرێت. بەپێی زانیارییەکان ڕاپۆرتەکە سێ قۆناغ لەخۆ دەگرێت بۆ هاتنەوەی گەریلاکان بۆ ناو کەسوکاریان.

هەنگاوی داهاتوو: چاوەڕێ دەکرێت لیژنەیەکی هاوبەش پێکبهێنرێت لە ئەندامی هەریەک لە ئاک پارتی، جەهەپە، مەهەپە و دەم پارتی و بەرەی ڕێگای نوێ. کاری ئەم لیژنەیە تاوتوێکردنی ڕاپۆرتی سەرجەم لایەنەکان دەبێت بۆ گەیشتن بە دەرئەنجامێکی هاوبەش.