ئاکپارتی پلانێکی سێ قۆناغی بۆ گەڕانەوەی گەریلاکانی پەکەکە دادەنێت

ئاڤا نیوز

ئاکپارتی دەسەڵاتدار پلانێکی داناوە کە لە سێ قۆناغ پێکدێت بۆ گەڕانەوەی گەریلاکانی پەکەکە بۆ تورکیا و باکووری کوردستان و ڕەوانەکردنی سەرکردەکانی پەکەکە بۆ وڵاتی سێیەم.

بڵاوکراوەی فەرمی: ڕۆژنامەی سەباح'ـی نزیک لە دەسەڵاتی تورکیا بڵاوی کردووەتەوە لەو ڕاپۆرتەی بڕیارە ئاکپارتی لە چەند ڕۆژی داهاتوودا پێشکەشی سەرۆکایەتیی پەرلەمانی  بکات بە ناوی "تورکیای بێ تیرۆر" دەبێت و پلانێک دەخاتەڕوو کە لە سێ قۆناغ پێک دێت.

قۆناغی یەکەم: گەڕانەوە بۆ ماڵەوە
لەم قۆناغەدا بەپێی یاسای "گەڕانەوە بۆ ماڵەوە" ئەو گەریلایانە دەگەڕێنەوە کە لە دەرەوەی تورکیا و باکووری کوردستانن و شەڕیان لە دژی تورکیا نەکردووە.

ئەوان سزا نادرێن، بەڵام بۆ ماوەی پێنج ساڵ دەخرێنە ژێر چاودێری. حکومەت هاوکارییان دەکات بۆ دۆزینەوەی کار. بەپێی زانیارییەکان 80%ـی گەریلاکان کە لە دەرەوەن شەڕیان لە دژی تورکیا نەکردووە.

قۆناغی دووەم: سووککردنی سزاکان
ئەمە دوای ئەوە جێبەجێ دەکرێت کە تورکیا دڵنیا دەبێتەوە لەوەی پەکەکە چەکی داناوە، خۆی هەڵوەشاندووەتەوە و چاودێری پێشهاتەکانی سووریا دەکرێن.

بەپێی پلانەکە بە هۆی ئەوەی پەکەکە نامێنێت، ئەوانەی پێشتر لە دژی تورکیا شەڕیان کردووە وەک ئەوەی "تاوانی دیکە"ـیان کردبێت مامەڵەیان لەگەڵدا دەکرێت. بەم جۆرەش لەبەر ئەندامبوون، بانگەشەکردن و یارمەتیدانی پەکەکە سزا نادرێن. بەڵکوو لەسەر تاوانی وەک "کوشتن" و "بریندارکردن" سزا دەدرێن. بەم جۆرەش ماوەی زیندانیکردنیان کەم دەبێتەوە.

قۆناغی سێیەم: چارەنووسی سەرکردەکان
لە کۆتا قۆناغدا، بڕیار لە چارەنووسی سەرکردەکانی پەکەکە دەدرێت. یەکێک لە پێشنیازەکان ناردنیانە بۆ وڵاتی سێیەم. ئاکپارتی دەڵێت ئەم پرۆسەیە درێژخایەنە و بە شێوەیەکی ڕوون و ئاشکرا بەڕێوە دەچێت.