پاسپۆرتی سلێمانی كارئاسانی بۆ دانیشتووانی چەمچەماڵ دەكات؛ بە ڕۆژێک مامەڵەكانتان تەواو دەكەین

ئاڤا نیوز

بەڕێوەبەرایەتیی پاسپۆرتی سلێمانی بە هاووڵاتییانی چەمچەماڵ ڕادەگەیێنێت، ئەوەی پاسپۆرتی پێویستە، لە ماوەی یەک ڕۆژدا مامەڵەكەی تەواو دەكرێت.

ئەوەی پێویستە بیزانیت: بەهۆی لافاوە كارەساتبارەكەی چەمچەماڵ، فەرمانگەی پاسپۆرتی چەمچەماڵ، دووچاری زیانێكی ماددی زۆر بووەتەوە و ڕاییكردنی مامەڵەكان لەو فەرمانگەیە وەستاوە، لەپێناو كارئاسانی بۆ هاووڵاتیانی سنوورەكە، مامەڵەكانیان لە بەڕێوەبەرایەتیی پاسپۆرتی سلێمانی ڕایی دەكرێت.

ڕاگەیێنراوی فەرمی: بەشی ڕاگەیاندنی پاسپۆرتی سلێمانی، لە ڕاگەیێنراوێكدا داوا لە هاووڵاتیانی دانیشتووی چەمچەماڵ دەكات؛ ئەوانەی مامەڵەی پاسپۆرتیان هەیە، لەكاتژمێر 8:30ـی خولەكی بەیانی لەنێو بەڕێوەبەرایەتییەكە ئامادە بن بۆ ئەوەی لە ماوەی یەك ڕۆژدا، مامەڵەكانیان تەواو بكرێت و لەهەمان ڕۆژدا پاسپۆرتەكانیان وەربگرنەوە.

پاسپۆرتی سلێمانی ڕوونیكردووەتەوە، ئامانجمان لەم کارە ئەوەیە، خزمەتی زیاتری هاووڵاتیانی سنووری چەمچەماڵ بکەین و بەهۆی درەنگ هاتنیان، کارەکەیان نەکەوێتە رۆژێکی دیکە، کە بەهۆیەوە توشی زەحمەتی و خەرجی زیاتر دەبن.